නිතර කිපෙන ඔබ කියවිය යුතුම ලිපියක්

 ඡායාරූපය:

නිතර කිපෙන ඔබ කියවිය යුතුම ලිපියක්

Paul Ekman's පවසන අන්දමට අපට දැනෙන, විඳින, විඳවන හැඟීම් වර්ග 6ක් තිබෙනවා. ඒවා නම් තරහ, බය, අප්‍රිය බව, දුක, සතුට සහ විස්මයයි. මෙම හැඟීම් මූලික හැඟීම් වන අතර මේවා අප කාටත් පොදුවේ පවතී. වර්තමානයේ සමාජය තුළ හැඟීම්වලට දෙන ඉඩ කඩ ඉතා අඩුයි. මේ නිසා අපට අපේ හැඟීම් හරියාකාරව හඳුනා ගන්න අපහසුයි වගේම අනෙකුත් අයගේ හැඟීම් තේරුම් ගැනීමද ඉතා අපහසුයි. අපි අපේ හැඟීම් සමඟ ගැටෙමින් අප අවට සිටින මිතුරන්, නෑදෑයන්, නිවැසියන් අතර කතාබහ ඇති වන්නේ, යාලු වෙන්නේ, දුක් වන්නේ අපිට අපව හරිහැටි තේරුම් ගැනීමට නොහැකි වූ විටය.

ඔබත් ඔබේ හැඟීම් තේරුම් නොගැනීම නිසා හෝ ඔබේ සමීපතමයකුගේ හැඟීම් හඳුනා ගැනීමට නොහැකි වීම නිසා කවදා හෝ අපහසුතාවකට පත්ව තිබෙනවාද? ඔබ දැන සිටියාද මෙය වළකාගන්නට පුළුවන් බව? ඇත්තෙන්ම පුළුවන්. එහෙත් ඒ සඳහා ඔබ තුළ වර්ධනය කර ගත යුතු ගුණාංගයක් පවතිනවා.

එය emotional /Intelligence හෙවත් හැඟීම් පාලන බුද්ධියයි. මෙයින් අදහස් කරන්නේ ඔබ තුළ ඔබේ හැඟීම් පාලනය කිරීමට ඇති හැකියාව පිළිබඳවයි.

මෙහි පළමු කාරණාව වන්නේ ඔබ ඔබේ හැඟීම් හඳුනා ගැනීමයි. එනම්, ඔබ, ඔබ තුළ පවතින හැඟීම් පිළිබඳ සිහියෙන් සිටීමයි. දෙවැනි කාරණාව වන්නේ ඔබේ හැඟීම් පාලනය කිරීමයි. එනම්, ඔබ තුළ ඇති හැඟීම් සුදුසු ආකාරයට හසුරුවා ගැනීමයි. මේ හරහා ඔබට හැකි වෙනවා නිවැරදි ආකාරයෙන් අන් අය තුළ ඇති හැඟීම් හඳුනා ගැනීමට. එය ඉතාම ශක්තිමත් සබඳතා වර්ධනයට හේතු වනවා. තුන්වැනි කාරණාව වන්නේ සබඳතා පවත්වාගෙන යෑම පිළිබඳවයි. අන් අයට උදවු කිරීමට, ඔවුන්ගේ හැඟීම් සමඟ මුහු වීමට එය ඉතා වැදගත් වෙනවා. ඉතින් ඔබ තුළ වර්ධනය කරගත යුතු මෙම ගුණාංගය තුළින් ඔබට ඔබ තුළ හට ගන්නා වූ තරහව පාලනය කර ගැනීමට එය පිටිවහලක් කරගත හැකි ආකාරයට පැහැදිලි කර ගනිමු.

තරහව ඇති වන්නේ යම් යම් අවස්ථාවන්වලදී අප දක්වන්නා වූ ප්‍රතිචාර මත මිස ඒ අවස්ථාව නිසා නොවේ. උදාහරණයක් ලෙස නිවසේ යමකු අතින් භාණ්ඩයක් කැඩී යනවා යැයි සිතමු. ඊට ඔබ තරහා ගැනීම හෝ නොගැනීම ඔබගේ ප්‍රතිචාරයක් මිස එය භාණ්ඩය බිඳීම නිසා තරහව හට ගැනීමක් නොවේ. මේ නිසා ඔබ තුළ තරහව හට ගැනීම වළකාලිය හැකි ක්‍රම කිහිපයක් මෙසේ පැහැදිලි කළ හැකිය.

යම්කිසි තරහා ඇති කරවන අවස්ථාවල ඔබේ හැඟීම්බරිත ප්‍රතිචාර පිළිබඳ අවබෝධය ලබා ගැනීම සිදු කළ යුතුයි. එතුළින් ඔබට තරහව පැමිණෙන විට එය හඳුනාගෙන මැඩපැවැත්වීමට පහසු වනවා. එලෙස හඳුනා ගත් ආකාර නිතර ආවර්ජනය කර අවබෝධ කර ගන්න. හැකි පමණ අනුවර්තනය වන ආකාරයේ සිතිවිලි ඇතිකර ගන්නට පුරුදු වන්න. උදාහරණයක් ලෙස යම්කිසි පුද්ගලයකුගේ ක්‍රියාවන්ට ඔබට තරහා එනවා නම් “ඒ එයාගෙ හැටි” යනාදී වශයෙන් සිතීමට පුරුදු වන්න. ඔබ තුළ ඇතිවන තරහව අඩු කිරීමට සිතෙන් තරහව සමඟ තරග කරන්න. උදාහරණයක් ලෙස එකේ සිට දහයට ගණන් කරන්න. නිතරම තරහා ඇති කරවන පුද්ගලයා පිළිබඳ අවබෝධ කර ගැනීමට සහ තේරුම් ගැනීමට උත්සාහ කරන්න. එනම් සහකම්පන ගුණය තුළින් ඔහු දෙස බලන්න පුරුදු වන්න.

මේ කුමන අයුරකින් හෝ ඔබ තුළ පැන නඟින තරහ පාලනය කර ගත් සෑම අවස්ථාවකදීම ඔබ ඔබටම සුබ පතන්න. එවැනි අවස්ථාවක ඔබ එලෙසින් ක්‍රියා කිරීම පිළිබඳ ඔබ ඔබවම අගය කරන්න. එමඟින් ඔබට වඩාත් හොඳ පෞරුෂයක් සහ මානසික ශක්තියක් ගොඩනැඟෙන අතර එමඟින් ඔබට ඔබේ තරහ පාලනය කිරීමට පහසු වනවා.

මෙහිදී ඔබ හොඳින්ම මතක තබා ගතයුතු තවත් කාරණයක් වන්නේ ඔබ අන් අයගෙන් බලාපොරොත්තු වන ප්‍රමාණය අවම කරන්න. උදාහරණයක් ලෙස ඔබට ඔබේ පෙම්වතා හෝ පෙම්වතිය නිතර දුරකථන ඇමතුම් ලබා නොදීම හෝ තමා දුරකථන ඇමතුමක් ලබා දෙන සෑම මොහොතකම ඔහු හෝ ඇය ඇමතුම එවෙලේම නොගැනීම පිළිබඳ නිතර තරහා යනවා නම් එය එසේ වන්නේ ඔබ එවැන්නක් සිදු විය යුතු යැයි බලාපොරොත්තු වන නිසායි. ඒ නිසා ඔබ පළමුවෙන්ම එවැනි බලාපොරොත්තු සිතින් අත් හරින්න. දවසේ නියත වේලාවක් දුරකථන ඇමතුම් ලබා ගැනීමට වෙන් කරන්න. රාජකාරි කටයුතුවල නිරතව සිටින විට නිතර දුරකථන ඇමතුම් ලබා දෙමින් කරදර නොකරන්න. එවිට හදිසි අවස්ථාවක් නිසා ඔබ ඇමතුමක් ගන්නා විට අනිවාර්යයෙන්ම ඔහු හෝ ඇය ඇමතුමට පිළිතුරු දේවි.

ඔබ ඔබේ වචනය සංවර කර ගැනීමත් ඉතාම වැදගත්. ඔබේ කටින් පිටවන වචන ඔබ තුළ මෙන්ම අන් අය තුළද තරහව ඇති කිරීමට ඉඩ නොදෙන්න. නිරන්තරයෙන් ධනාත්මක සිතිවිලි පමණක්ම බෙදා ගැනීමට පුරුදු වන්න. මේ ආකාරයට ඔබත් ඔබේ සිතෙහි හටගන්නා හැඟීම් නිවැරදි ලෙස හඳුනාගෙන එය ඔබේ පාලනයට නතු කරගන්නේ නම් ඔබට වඩාත් සුවදායී ජීවිතයක් හෙට දිනයේදී හිමිකර දෙනු ඇත.

වෛද්‍ය කේ. කේ. ජී. ලහිරු ප්‍රබෝධ
දිස්ත්‍රික් මූලික රෝහල - දික්ඔය

මාතෘකා