බර අඩු කරන ආහාර සැලසුමක්

 ඡායාරූපය:

බර අඩු කරන ආහාර සැලසුමක්

අද සමාජයේ බොහෝ දෙනකු මුහුණදෙන බරපතළ ගැටලුවක් වන්නේ අනවශ්‍ය තරබාරු බවයි. එම තත්ත්වය නැතිකර ගැනීමට විවිධ ක්‍රම අනුගමනය කළත් ඇතැම් විට එයින් නිසි ප්‍රතිඵලයක් ලැබෙන්නේ නැහැ. ස්ථුලභාවයට බලපාන ප්‍රධානතම සාධකය වන්නේ වැරදි ආහාර රටාවයි. එම නිසා දෛනික ආහාර රටාව නිවැරදි කර ගැනීමෙන් පහසුවෙන්ම ස්ථුලතාවයෙන් වැළකිය හැකිය. එය සිතනා තරම් පහසු කාර්යක් නොවුණද නිසි ආහාරපාන ගැනීමෙන් සහ යහපත් ආහාර රටාවකට පුරුදු වීමෙන් තරබාරුව මට්ටු කිරීම අසීරු නොවේ. මෙහි සඳහන් ආකාරයට දෛනික ආහාර රටාව සහ ක්‍රියාකාරකම්වල නිරත වීමෙන් ශරීරයේ අනවශ්‍ය බර පාලනය කරගත හැකිය. එමෙන්ම එමඟින් නිරෝගිමත් දිවි පෙවෙතකටද උරුමකම් කිව හැකිය.

වැඩිපුර ක්‍රියාශීලී වීම හා ව්‍යායාමවල නිරත වීම

සාමාන්‍යයෙන් මිනිස් සිරුරට අවශ්‍ය වන්නේ දිනකට විනාඩි 30-45ක පමණ ව්‍යායාමයකි. ආරම්භයේදී එතරම් දිගු වේලාවක් ව්‍යායාම කිරීම අපහසු බැවින් පළමු දිනයේදී ඊට වඩා අඩු වෙලාවක් ව්‍යායාම කර ඉන් පසු ටිකෙන් ටික ව්‍යායාම්වල නිරත වන කාලය වැඩිකර ගන්න. හුස්ම ගැනීමේ වේගය වැඩි කරන ව්‍යායාම් සිරුරේ බර අඩු කිරීමට ඉවහල් වන අතර පිහිනීම, ඇවිදීම, බයිසිකල් පැදීම, බැඩ්මින්ටන් ගැසීම වැඩි දේවල් සුදුසු වේ.

ආහාර ගැනීමේ නිසි රටාව

ඒ සඳහා නිසි ක්‍රමයක් තිබීම අත්‍යවශ්‍ය වන අතර, ප්‍රධාන ආහාර වෙල් තුන අනිවාර්යයෙන්ම ගත යුතුය. ප්‍රධාන ආහාර වේල්වලට තන්තු සහිත ආහාර ගැනීම වඩාත් උචිත වේ. එළවළු, පලතුරු, මාංශ භෝග (පරිප්පු, කඩල, කව්පි) හා ධාන්‍ය වර්ග (බත්, කුරක්කන්) වැනි දෑ ආහාර වේලට එකතු කර ගැනීම වැදගත් වේ. ක්ෂණික ආහාර (සොසේජස්, නූඩ්ල්ස්, බිස්කට් වර්ග) සහ සකස් කළ ආහාර ගැනීම හැකි තාක් අඩු කර ගැනීමෙන් ඔබට පහසුවෙන්ම සිරුරේ අනවශ්‍ය බර අඩු කර ගැනීමේ හැකියාව තිබේ.

මේද සහිත ආහාර

මේදය ග්‍රෑම් එකකින් ශරීරයට කැලරි නවයකුත් සීනි ග්‍රෑම් එකකින් ශරීරයට කැලරි හතරකුත් එක්වන බව ඔබ දන්නවාද? මිනිස් ශරීරයට වැඩිපුර අනවශ්‍ය කැලරි එකතු වන්නේ මේ දෙවර්ගය තුළින් බව නවතම සමීක්ෂණවලින් හෙළි වී තිබේ. එම නිසා බටර්, මාගරින්, තෙල් අඩංගු ආහාර, හරක් මස් සහ ඌරු මස් ආදී ආහාර භාවිතය හැකිතාක් අඩු කිරීමෙන් ඔබගේ ශරීරයට අනවශ්‍ය කැලරි එක්වීම වළක්වා ගත හැකිය. ඒ වෙනුවට මේදය අඩු කිරි, මේදය අඩු යෝගට් හා මේදය අඩු බටර් කෑම ආහාරයට ගන්න.

සීනි හා කබෝහයිඩ්‍රේට්

සීනි දමා තේ පානය කිරීමෙන් වැඩිපුර කැලරි ප්‍රමාණයක් ඔබේ ශරීරයට එකතු වේ. එමෙන්ම අයිස්ක්‍රීම්, පුඩින් වැනි අතුරුපස වර්ග සහ කේක් ආහාරයට ගැනීම අඩු කරන්න. බත්, පාන්, රොටී, පිට්ටු, ආප්ප, ඉඳිඅප්ප වැනි පිෂ්ටය සහිත ආහාර ගැනීමද අඩු කරන්න.

බර ගැන වාර්තාවක්

ආරම්භයේදී ඔබේ සිරුරේ බර මැන එය සටහන් කරගන්න. ව්‍යායාම සහ ආහාර පාලනය සමඟ ශරීරයේ බර අඩුවීම සම්බන්ධයෙන් වාර්තාවක් ඔබම පිළියෙල කර එය නියමිත පරිදි සලකුණු කරන්න. ඒ වාර්තාව දිගටම පවත්වාගෙන යන්න. එවිට ඔබගේ සිරුරේ බර අඩුවන විට ඔබේ සිතටද ඒ පිළිබඳ සතුටක් ඇතිවන අතර සිතේ සැහැල්ලුව සහ සතුට නිරෝගී බවට විශාල වාසියක් ගෙනදෙන බවත් මතක තබාගන්න.

[නිමාෂා සඳරුවනි]

මාතෘකා