උෂ්ණාධික කාලගුණයෙන් ආරක්ෂා වීමට වෛද්‍ය උපදෙස්

 ඡායාරූපය:

උෂ්ණාධික කාලගුණයෙන් ආරක්ෂා වීමට වෛද්‍ය උපදෙස්

සිංහල හින්දු අලුත් අවුරුදු සමයේ තෑගි බෝග සහ නිවසට අවශ්‍ය දෑ මිලදී ගැනීම සඳහා ශ්‍රී ලාංකිකයෝ වැඩි දෙනෙක් නිවසින් බැහැර යති. එලෙස වැඩි දෙනෙකු කඩ සාප්පු වෙත යන්නේ රට පුරා උෂ්ණාධික කාලගුණයක් පවතින අතරතුරදීය. උත්සව සමයේ කාර්යබහුල ඔබ සහ පවුලේ සාමාජිකයන් උෂ්ණාධික කාලගුණයෙන් ආරක්ෂා වී සිටීම සඳහා අනුගමනය කළ යුතු ක්‍රියාමාර්ග මොනවාද?

වියලි කාලගුණික තත්ත්වය හමුවේ ශරීරයේ විවිධ සංකූලතා ඇති වීමේ අවදානමක් පවතින බව විශේෂඥයෝ පෙන්වා දෙති. උෂ්ණාධික කාලගුණය හමුවේ ළමුන්, වැඩිහිටියන් සහ රෝගීන් වඩාත් පීඩාවට පත්වන බව කායික රෝග පිළිබඳ විශේෂඥ වෛද්‍ය යාපා උදය කුමාර පවසයි. එමෙන්ම දැඩි අව්රශ්මියට නිරාවරණය වී වැඩ කරන පුද්ගලයන්ට මෙන්ම එළිමහනේ ක්‍රීඩාවල නිරත පුද්ගලයන්ටද ඉන් බලපෑම් එල්ල විය හැක.

විශේෂඥ වෛද්‍යවරයා පෙන්වා දෙන පරිදි වියළි කාලගුණය සහ අධික දාහය හමුවේ පුද්ගලයන්:

විජලනයට පත් විය හැක.

සමේ පිළිස්සුම් ඇති විය හැක (Sun burns).

උණුසුම් කාලගුණය හමුවේ ඇති විය හැකි ඉහත කී බලපෑම් අවම කර ගැනීම සඳහා අනුගමනය කළ යුතු පියවර මොනවාද?

වෛද්‍ය උපදෙස් අනුව:

හැකි තරම් පිරිසිදු ජලය පානය කිරීම.

හිරු රශ්මියෙන් වැළකී සිටීම සඳහා සන් ක්‍රීම් භාවිත කිරීම.

උෂ්ණත්වය පිට නොවන ආකාරයේ ආවරණය වූ ඇඳුම් ඇඳීමෙන් වැළකීම (සුදු හෝ ලාපැහැති සැහැල්ලු ඇඳුම් උචිතය).

"සිසිල් බීම කියලා අපි පානය කරන්නේ කාබනේට් ජලය සහ කැලරි අඩංගු දේවල්. නමුත් ඊට වඩා හොඳයි අපේ ස්වාභාවික පරිසරයේ තිබෙන තැඹිලි වගේ පානයක්, ඒ වගේම අපට සාදා ගත හැකි දොඩම්, දෙහි වගේ දේවල්. හැබැයි ඒ සඳහා සීනි සහ ලුණු අඩුවෙන් පාවිච්චි කරන්න."

"සිසිල් බීමවලින් වළකින ඒක තමයි සුදුසු. ඒවා පාවිච්චි කරන්නම ඕනි නම් පැණි බීම බෝතල්වල සඳහන් වර්ණ සංකේත අතුරින් කැලරි අඩුම කොළ වර්ණය භාවිත කරන්න," යනුවෙන් මොනරාගල දිස්ත්‍රික් මහ රෝහලේ කායික රෝග පිළිබඳ විශේෂඥ වෛද්‍ය යාපා උදය කුමාර කියා සිටියේ බීබීසී සිංහල සේවය වෙත අදහස් දක්වමිනි.

උණුසුම අවම කර ගැනීම සඳහා ගත හැකි පියවර:

නිවසේ දොර ජනෙල් විවෘත කර තැබීම.

දැඩි අවුරශ්මිය පවතින අවස්ථාවල නිවසින් බැහැර යාමෙන් වැළකී සිටීම.

ස්නානය කිරීම.

නිවසින් බැහැර දීර්ඝ ගමනකදී කල් තියා සැලසුම් කිරීම. (අවශ්‍ය ජලය සහ පාන වර්ග සකසා ගැනීම සඳහා)

හිස ආවරණය කර ගැනීම සඳහා හිස්වැස්මක් භාවිත කිරීම.

අධික උෂ්ණත්වය හමුවේ පීඩාවට පත් විය හැකි පවුලේ සාමාජිකයන්, ඥාතීන් පිළිබඳ විමසිලිමත් වන්න.

මේ අතර ආපදා කළමනාකරණ මධ්‍යස්ථානයේ සහකාර අධ්‍යක්ෂ ප්‍රදීප් කොඩිප්පිලි කියා සිටියේ වියළි කාලගුණය මැයි මාසය තුළත් බලාපොරොත්තු විය හැකි යැයි කාලගුණවිද්‍යා දෙපාර්තමේන්තුව දන්වා ඇති බවය.

පානීය ජලයට ලවණ මිශ්‍ර වීම හේතුවෙන් කළුතර දිස්ත්‍රික්කයේ පනස්දහසක් පමණ පීඩාවට පත්ව ඇති බව කී ඔහු පානීය ජල ගැටලුව විසඳීම සඳහා ආපදා කළමනාකරණ මධ්‍යස්ථානය කටයුතු කරමින් සිටින බව සඳහන් කළේය.

(උපුටා ගැනීම බීබීසී ඇසුරිනි)

මාතෘකා