පෙෂර් වැඩි නම් මෙහෙම කන්න

 ඡායාරූපය:

පෙෂර් වැඩි නම් මෙහෙම කන්න

අධිරුධිර පීඩනය (High Blood pressure) යනු වත්මන් සමාජයේ බහුල රෝගී අවස්ථාවක් කිවහොත් නිවැරදිය. පුද්ගලයකු තුළ අධි රුධිර පීඩනය දීර්ඝ කාලයක් පැවතීම නිසා හෘදයාබාධ, වකුගඩු ආශ්‍රිත ආබාධ සහ ආඝාත තත්ත්වයන්ද ඇතිවීමේ ප්‍රවණතාවක් දක්නට ලැබෙන බව වෛද්‍ය මතයයි. ලෝක ජනගහනයෙන් හතරෙන් එකක් අධික රුධිර පීඩන තත්ත්වයෙන් පෙළෙන බව ලෝක සෞඛ්‍ය සංවිධානය කළ සමීක්ෂණයක් මඟින් හෙළිවී තිබෙනවා. ඒ අනුව බලන විට මෙය ඉතා බැරෑරුම් සමාජ ගැටලුවකි.

ශරීරයට එකතු කර ගන්නා ලුණු ප්‍රමාණය හැකි තරම් අවම කර ගැනීම, පොටෑසියම්, මැග්නීසියම්, තන්තු වැඩි ප්‍රමාණයක් ශරීරයට එකතු කර ගැනීමෙන් පහසුවෙන්ම අධි රුධිර පීඩන තත්ත්වයට ගොදුරුවීමෙන් ආරක්ෂා විය හැකිය. අධි රුධිර පීඩනයෙන් පෙළෙන රෝගීන්ට ගුණදායක ආහාරපාන කිහිපයක් පිළිබඳයි මේ සටහන.

දෙළුම්

දිනකට දෙළුම් යුෂ කෝප්පයක් බැගින් පානය කිරීම මගින් අධි රුධිර පීඩනය සතියකින් අඩු කරගත හැකි බව පර්යේෂණවලින් හෙළි වී තිබෙනවා. අධික ලෙස සීනි නොයෙදූ , පෝෂණීය දෙළුම් යුෂ කෝප්පයක් උදෑසන හිස්බඩ පානය කිරීම මගින් අධි රුධිර පීඩනය ඇතුළු බොහෝ දරුණු ලෙඩරෝග රාශියකින් ආරක්ෂා වීමේ හැකියාව පවතිනවා.

සුදුලූනු

සුදුලූනු රුධිර නාලිකා පුළුල් කර, රුධිරය ගමන් කිරීම සඳහා වැඩි ඉඩකඩක් ලබා දෙනවා. මෙලෙස රුධිර නාලිකා විස්තාරණය වීම නිසා රුධිර පීඩනය නිසි මට්ටමක පවත්වාගෙන යෑමට උපකාරී වනවා.

කොළ පැහැති එළවලු වර්ග

කොළ පැහැති එළවළු වර්ගවල බහුල ලෙස පොටෑසියම් අඩංගු වෙනවා. එමඟින් මිනිස් සිරුරේ ඇති අනවශ්‍ය සෝඩියම් මුත්‍ර මඟින් ඉවත් කරගැනීමට හැකිවෙනවා. ගෙවත්තේ වැවෙන කොළ පැහැති නැවුම් එළවළු දිනපතා ඔබගේ ආහාර වේලට එකතු කරගතහොත් අධි රුධිර පීඩනයෙන් වැළකීම එතරම් අපහසු කරුණක් නොවේ.

ඔලිව් තෙල්

ඔලිව් තෙල්වල සිරුරට හිතකර මේදය යහමින් අඩංගු වෙනවා. මෙහි පවතින හිතකර මේදය අධි රුධිර පීඩනය අවම කර ගැනීම සඳහා සුවිශේෂී දායකත්වයක් ලබාදෙනවා. හැකි සෑම විටම ආහාරවලට ඔලිව් තෙල් එකතුකර ගැනීමට හැකිනම් පහසුවෙන්ම ඔබට අධි රුධිර පීඩනයෙන් වැළකිය හැකිය.

රතු අල

රතු අල හෙවත් බීට්වල අඩංගු වෙන නයිට්‍රික් ඔක්සයිඩ මඟින් රුධිර පීඩනය අවම කරනවා. බීට් යුෂ පානය කිරීමෙන් පැය 24ක් තුළ අධි රුධිර පීඩන තත්ත්වයන් අවම කරගැනීමේ හැකියාව පවතින බව නවතම පර්යේෂණවලින් හෙළි වී තිබෙනවා. රතු අල සලාද, ජූස් ආකාරයෙන් අවම පිසීමකට ලක් කර ආහාරයට එක්කර ගැනීමෙන් ඔබට යහපත් ප්‍රතිඵල ලබාගන්න පුළුවන්.

කෙසෙල්

පොටෑසියම් වැඩි වශයෙන් අඩංගු ආහාර අනුභව කිරීම හා පොටෑසියම් සහිත පෝෂණ අතිරේක ලබා ගැනීම අධි රුධිර පීඩන රෝගියකුට වඩා වැදගත්. කෙසෙල් කියන්නේ පොටෑසියම්වලින් ඉතා පොහොසත් ආහාරයක්. ඒ නිසා දිනපතා ඔබගේ ආහාරවේලට කෙසෙල් එකතු කර ගැනීම පුරුද්දක් කර ගන්න අමතක කරන්න එපා.

මේදය රහිත කිරි සහ යෝගට්

මේදය රහිත කිරිවල කැල්සියම් විශාල ප්‍රමාණයක් අන්තර්ගත වෙනවා. ඒ නිසා දිනපතා මේදය රහිත කිරි හෝ යෝගට් ආහාරයට ගැනීම පුරුද්දක් වශයෙන් කිරීම මඟින් ඔබට අධි රුධිර පීඩනයෙන් හා බොහෝමයක් ලෙඩ රෝගවලින් ආරක්ෂා වීමේ හැකියාව පවතිනවා. නමුත් ඔබ යෝගට් මිලදී ගැනීමේදී සීනි අවම ලෙස යොදා සකස් කර ඇති යෝගට් පමණක් මිලදී ගැනීමෙන් ඔබේ සෞඛ්‍ය තත්ත්වය යහපත් අයුරින් පවත්වා ගත හැකිය.

සැමන්, මෑකරල් හා ඔමේගා 3 මේද අම්ල අඩංගු මාළු වර්ග

ශරීරයට අවශ්‍ය ප්‍රෝටීන් ලබා ගැනීම සඳහා මාළු වර්ග ආහාරයට ගැනීම අත්‍යවශ්‍යයි. මෑකරල්වල මෙන්ම සැමන් වැනි හිතකර මේදය අඩංගු මාළු වර්ගවල ඔමේගා 3 මේද අම්ලය යහමින් අන්තර්ගත වෙනවා. ඔමේගා 3 මේද අම්ලය මඟින් අධි රුධිර පීඩනය අවම කර ගැනීමට මෙන්ම ශරීරයට අවශ්‍ය පෝෂණය ලබා ගැනීමටත් පුළුවන්.

ඕට්ස්

ඕට්ස් කියන්නේ තන්තු විශාල ප්‍රමාණයක් අන්තර්ගත වෙන පෝෂණීය ආහාරයක් මෙන්ම ලොව පුරා සුපිරිම සෞඛ්‍ය සම්පන්න ආහාර අතරින් ප්‍රමුඛස්ථානය ගන්නා ආහාරයක් කිව්වොත් නිවැරදියි. ඕට්ස්වල ඉතා සුළු ප්‍රමාණයක් සෝඩියම් අඩංගු වීම නිසා ඒවා ශරීරයට සෑම අයුරකින්ම හිතකරයි. මෙම ධාන්‍ය වර්ගය අප සාමාන්‍යයෙන් මුං ඇට, කඩල වැනි ධාන්‍ය තම්බන ආකාරයට හොඳින් පෙඟෙන්නට දමා ඉන්පසු හොඳින් තම්බා ආහාරයට ගත හැකිය. කැමතිනම් එයට පොල් මිශ්‍ර කර වඩාත් රසවත් කර ගැනීමටත් පුළුවන්.

මෙම ආහාර නවය අද සිට ඔබේ කෑමවේලට එක් කර ගන්න. එවිට ඔබට අධි රුධිර පීඩනයෙන් තොර සුවපත් දිවියක් ගත කිරීම සිහිනයක් වන්නේ නැහැ.

[නිමාෂා සඳරුවනි]

මාතෘකා