රොබර්ට් ඒ. හෙයින්ලෙන්ගේ අප්‍රකට නවකතාවක් පළ වෙයි

 ඡායාරූපය:

රොබර්ට් ඒ. හෙයින්ලෙන්ගේ අප්‍රකට නවකතාවක් පළ වෙයි

විසිවැනි සියවසේ වඩාත් කැපීපෙනුණු ඇමෙරිකානු විද්‍යා ප්‍රබන්ධ රචකයකු වූ රොබර්ට් ඒ. හෙයින්ලෙන් රචනා කළ අප්‍රකට නවකතාවක් මේ වසර තුළදී ප්‍රථම වරට ප්‍රකාශයට පත්වීමට නියමිතයි. විද්‍යා ප්‍රබන්ධ කෘති සඳහා වාර්ෂිකව පිරිනැමෙන හියුගෝ සම්මානයෙන් පිදුම් ලද ලේඛකයකු වන ඔහු 1980 ගණන්වලදී රචනා කළ ‘ද නම්බර් ඔෆ් ද බෙස්ට්’ (The Number of the Beast) නමැති ආන්දෝලනාත්මක විද්‍යා ප්‍රබන්ධ නවකතාවට කිසියම් අයුරකින් සමාන වන නමුදු අවසානය හාත්පසින්ම වෙනස් අයුරින් රචනා කර ඇති මේ අප්‍රකට නවකතාවේ අත්පිටපත සකසා ඇත්තේ ලේඛකයාගේ සටහන් සහ යතුරු ලියනය කරන ලද අත්පිටපතක පිටු ඇසුරින් බවයි සඳහන් වන්නේ. වචන 185,000කින් පමණ සමන්විත වන මේ නවකතාව ‘සික්ස්-සික්ස්-සික්ස්’ (Six-Six-Six) යන නමින් මේ වසර අගදී ප්‍රකාශයට පත්කිරීමට අපේක්ෂා කෙරෙනවා. ඒ සමඟම එහි ඩිජිටල් පිටපත් සීමිත සංඛ්‍යාවක් සහ ‘ද නම්බර් ඔෆ් ද බෙස්ට්’ නවකතාවේ නැවත මුද්‍රණයක්ද පළ කිරීමට අපේක්ෂිතයි. මේ කෘති පළ කරන්නේ ෆීනික්ස් පික් නමැති නමැති ප්‍රකාශන ආයතනයයි. කලක් තිස්සේ අප්‍රකටව පැවති අත්පිටපත නැවත සැකසීමේ කටයුත්තට මුල පුරමින් ඒ සඳහා හෙයින්ලෙන් ත්‍යාග භාරකාර අරමුදල සමඟ එක්ව කටයුතු කර ඇත්තේත් මේ ප්‍රකාශන ආයතනයයි.


ෆ්‍රාන්ස් කෆ්කා උපත ලැබූ නිවස කෞතුකාගාරයක් වෙයි

ජර්මන් බසින් ලේඛනයේ යෙදුණු බොහීමියානු යුදෙව් ලේඛක ෆ්‍රාන්ස් කෆ්කා උපත ලැබූ ප්‍රාග් නුවර පිහිටි නිවස කෞතුකාගාරයක් බවට පත්කිරීම සඳහා අවශ්‍ය ප්‍රතිසංස්කරණ කටයුතු මේ වන විට සිදු වෙමින් පවතිනවා. මේ වසර අවසන් වන විට අදාළ ප්‍රතිසංස්කරණ කටයුතු සියල්ල සම්පූර්ණ කිරීමට අපේක්ෂිතයි. මේ ප්‍රතිසංස්කරණ කටයුතු සඳහා ක්‍රව්න් මිලියන 165ක ඇස්තමේන්තුගත මුදලක් වැය වන බවයි කියැවෙන්නේ. කෆ්කාගේ ලේඛන දිවියට සුවිසල් බලපෑමක් ඇති කළ මේ නිවස ප්‍රාග් නුවර පිහිටි පැරණි වඩාත්ම ඓතිහාසික නිවාස අතරින් එකක් ලෙස සැලකෙනවා. එනිවස පිහිටා ඇත්තේ ප්‍රාග් නුවර පැරණි නගර චතුරශ්‍රයට යාබදව වන අතර 2000 වසරේදී ෆ්‍රාන්ස් කෆ්කා චතුරශ්‍රය ලෙස නම් කරනු ලැබූ නමුදු මේ වන විට එය හැඳින්වෙන්නේ කෆ්කා නිවස ලෙසයි. කෆ්කා නිවස ආශ්‍රිතව සිදු කෙරෙන ප්‍රතිසංස්කරණ සමඟම කෆ්කා වෙනුවෙන් උපහාර පිදීම සඳහා ප්‍රාග් නුවර ස්ථාන කිහිපයක ස්ථාපන කලා නිර්මාණ ඉදිකිරීමටද සැලසුම් කර තිබෙනවා. මෙයට පෙරද ප්‍රාග් නුවර වීදි කිහිපයක එවැනි ස්ථාපන කලා නිර්මාණ ඉදිකරනු ලැබුවා.


බ්‍රසීල නවකතාකාරියක නිර්මාණ මංකොල්ලයක

බ්‍රසීලයේ ජනප්‍රිය නවකතා රචිකාවක වන ක්‍රිස්ටියන් සෙරුයා වෙනත් ලේඛිකාවන්ගේ නිර්මාණ අමු අමුවේ සොරකම් කර ඇති බව හෙළි වී තිබෙනවා. ඇය රචනා කළ නවකතා බොහොමයක් සඳහා වෙනත් ලේඛිකාවන්ගේ නවකතාවල කොටස් ගෙඩි පිටින් සොරකම් කර ඇතැයි යන චෝදනාව එල්ල වීමෙන් පසුව ඇයගේ එක් නවකතාවක් ඇය විසින්ම වෙළෙඳපොළෙන් ඉවත් කරගෙන ඇතැයි වාර්තා වෙනවා. ඇමෙරිකානු නවකතා රචිකාවක වන කොර්ට්නි මිලාන් පවසන ආකාරයට, ඇගේ නවකතාවක කොටස් ඒ අයුරින්ම යොදාගනිමින් සෙරුයා විසින් රචනා කරන ලද නවකතාවක් ගැන මුල් වරට ඇයට දැනුම් දී ඇත්තේ රසිකාවක විසින්. නීතිය පිළිබඳ මහාචාර්යවරියක ලෙස කටයුතු කිරීමෙන් පසුව ඓතිහාසික ප්‍රේම නවකතා රචනා කිරීමට ලේඛිකාවක වන මිලාන් පවසන්නේ ඇය රචනා කළ ‘ද ඩචස් වෝර්’ (The Duchess War) නමැති නවකතාවේ ඡේද ගණනාවක් කිසිදු වචනයක් හෝ වෙනස් නොකර ඒ අයුරින්ම සෙරුයා රචනා කර ඇති ‘රෝයල් ලව්’ (Royal Love) නමැති නවකතාව සඳහා යොදාගෙන ඇති බවයි. මිලාන් මේ තොරතුරු සිය බ්ලොග් අඩවියේ පළ කිරීමෙන් පසුව පාඨක පිරිස් මෙන්ම තවත් ලේඛිකාවන් රැසක්ද එයට ප්‍රතිචාර දක්වමින් සඳහන් කර තිබුණේ සෙරුයා විසින් තවත් ලේඛිකාවන් රැසකගේ නිර්මාණ මේ අයුරින්ම සොරකම් කර ඇති බවයි.

මාතෘකා