පසස්නා පංකජී අමරසිංහගේ පරිවර්තන දෙකක් එයි

 ඡායාරූපය:

පසස්නා පංකජී අමරසිංහගේ පරිවර්තන දෙකක් එයි

යොවුන් ලේඛිකාවක වන පසස්නා පංකජී අමරසිංහගේ යොවුන් පරිවර්තන කෘති දෙකක් ‘අලි පැටියෙක් ගෙවත්තේ’ සහ ‘නටන වළහා’ නමින් පසුගියදා නිකුත් විය. මෙහි මුල් කෘතිය මයිකල් මෝපුර්ගෝගේ An Elephant in the Garden කෘතිය ඇසුරින්ද, දෙවන කෘතිය The Dancing Bear කෘතිය ඇසුරින්ද සිංහලට පෙරළී ඇත. ‘අලි පැටියෙක් ගෙවත්තේ’ සන්ථව ප්‍රකාශනයකි. ‘නටන වළහා’ චින්තන ඩිජිටල් ග්‍රැෆික්ස් ප්‍රකාශනයකි. මේ අනුව විශ්ව සාහිත්‍යයේ උසස් යොවුන් ග්‍රන්ථ දෙකක් මෙසේ සිංහලට එක් වී ඇති අතර එය පරිවර්තනය කරන පසස්නා පංකජී අමරසිංහ ප්‍රවීණ ලේඛක අජිත් කල්‍යාණ අමරසිංහගේ දියණියද වේ.


එරික් ඉලයප්ආරච්චිගේ අලුත්ම කාව්‍ය කෘතිය නිකුත් වේ

ප්‍රවීණ ලේඛක එරික් ඉලයප්ආරච්චිගේ අලුත්ම කාව්‍ය ග්‍රන්ථය ‘දස බිම්බරා’ පසුගියදා ගොඩගේ ප්‍රකාශනයක් ලෙස පසුගියදා නිකුත් විය. කවි 41ක් ඇතුළත් වන මෙය එරික්ගේ පහළොස් වන කාව්‍ය ග්‍රන්ථයයි. පද්‍ය සංග්‍රහය පසුකවරයේ කෘතිය හඳුන්වා ඇත්තේ “හුදු අදහස් සහ කාව්‍ය බීජ පමණක් ලුහුඬු ලෙස සලකුණු කරමින් සිංහල කවිය අවවර්ධිත වියමන් විශේෂයක් ලෙස නැවතීම වෙනුවට සමකාලීන අනුභූතීන් නව පුරාණෝක්ති ලෙස ගොඩනැවෙන කාව්‍ය භාෂාවක් හා සෞන්දර්යාත්මක කලා ආකෘතියක් දක්වා වර්ධනය කරනු ලබන පැදි එකතුවකි” වශයෙනි. මෙහි මිල රු. 200කි.


‘මැලෝරි ටවර්ස් බාලිකාවේ අලුත් මිතුරියෝ’ 8 දා එළිදකී

ප්‍රභාත් මිරිහාගල්ල පරිවර්තනය කළ ‘මැලෝරි ටවර්ස් බාලිකාවේ අලුත් මිතුරියෝ’ පරිවර්තන කෘතිය මෙම ජනවාරි 8 වෙනිදා අඟහරුවාදා කොළඹ මරදානේ දයාවංශ ජයකොඩි සමාගමේදී එළිදකී.

ඉනිඩ් බ්ලයිටන්ගේ New Term at Malory Towers කෘතිය ඇසුරින් මෙය සිංහලට නඟා ඇති අතර මෙසේ එළිදකින්නේ එම කෘති මාලාවේ දෙවැනි කාණ්ඩයේ පළමු කොටසයි. පළමු කාණ්ඩයේ කොටස් හයක් ඇති අතර ඒ හයම සිංහලට පෙරළී ඇත. ළමා චරිත සංවර්ධනයට එම කෘති මහත් උපකාරී වනු ඇත.

මාතෘකා