හදවත ලෙඩ වීමට කොලෙස්ටරෝල් බලපාන හැටි

 ඡායාරූපය:

හදවත ලෙඩ වීමට කොලෙස්ටරෝල් බලපාන හැටි

හදවතේ නිරෝගී බව ගැන කතා කිරීමේදී කොලෙස්ටරෝල් ගැන කතා නොකරම බැරිය. කොලෙස්ටරෝල් ශරීරයට හිතකර හා අහිතකර ලෙස දෙවර්ගයක් තිබේ.

කොලෙස්ටරෝල් යනු සෛලවල පැවැත්මට අත්‍යවශ්‍ය දෙයකි. එම මට්ටම අඩු වැඩි වීම මත හදවතේ නිරෝගී බව තීරණය වේ. එල්.ඩී.එල් යනු කාටත් හුරුපුරුදු බසින් කියනවා නම් 'නරක' කොලෙස්ටරෝල් වර්ගය ලෙස සැලකෙන අතර

එච්.ඩී.එල් යනු සිරුරට හිතකර නැහතොත් 'හොඳ' කොලෙස්ටරෝල්ය.

එම අහිතකර කොලෙස්ටරෝල් වැඩිවීමෙන් ඇතිවන ලෙඩ රෝගවලින් ගැලවෙන්නට නම් එදිනෙදා ආහාර පුරුදු සහ ජීවන පුරුදු වෙනස් කර ගැනීම කළ යුතුය. වෛද්‍ය විද්‍යාත්මකව යහපත් යැයි තහවුරු කර ඇති හදවතට හිතකර ආහාර වර්ග කිහිපයකි මේ.

 

ඕට්ස්

ඕට්ස් දිනකට එක් වරක් හෝ ආහාරයට එක්කර ගත්විට සමස්ත කොලෙස්ටරෝල් ප්‍රමාණය මෙන්ම අහිතකර කොලෙස්ටරෝල් මට්ටමද සැලකිය යුතු මට්ටමින් අඩුකර ගත හැකිය. ඒ සඳහා දිනකට ඕට්ස් ග්‍රෑම් 60ත් 80ත් අතර ප්‍රමාණයක් ආහාරයට ගැනීම ප්‍රමාණවත්ය. ආහාර වේල් තුනටම ඕට්ස් විවිධ ආකාරයට සකසා කෑමට ගත හැකි නම් එයද වැදගත්ය.

 

මුංඇට

මුංඇට, කව්පි, සෝයා වැනි ඇට වර්ග ග්‍රෑම් 30ක් පමණ එක් ආහාර වේලකට එක්කර ගත හැකි නම් අහිතකර කොලෙස්ටරෝල් සියයට 5.5ක් පමණ අඩුකර ගත හැකි අතර හිතකර කෙලෙස්ටරෝල් ප්‍රමාණය සියයට 3.2කින් පමණ ඉහළ නංවාගත හැකිය.

 

කජු

කජුවල ඔමේගා 3 මේදය යහමින් අඩංගු නිසා දිනකට කජුමද ග්‍රෑම් 50ක් හෝ ආහාරයට ගන්නවා නම් අහිතකර කොලෙස්ටරෝල් අඩුවන බව පැවසේ.

 

තෙල් සහිත මාළු

සැමන්, ටූනා, සාඩින්, මැකරල්, හුරුල්ලා වැනි මාළු වර්ගවලින් යමක් උදෑසන ආහාරයට එක්කර ගැනීමෙන් කොලෙස්ටරෝල් ප්‍රමාණය යහපත් මට්ටමක පවත්වාගත හැකිය. සාමාන්‍යයෙන් දිනකට සිරුරට අවශ්‍ය ඔමේගා 3 ප්‍රමාණය මිලිග්‍රෑම් 500ක් පමණ වේ. ඒ ප්‍රමාණය ග්‍රෑම් 150ක පමණ මාළු පෙත්තකින් ලබාගත හැකිය.

මේ හැර දිනකට මිනිත්තු 30ක් හොඳින් ඇඟට දාඩිය දමන තුරු ඇවිදීම, පිහිනීම, බයිසිකල් පැදීම වැනි ව්‍යායාමයක යෙදීමත් දුම්පානය සහ මත්පැනින් වැළකීමත් එළවළු පලතුරු වැඩිපුර ආහාරයට ගැනීමත් බටර් වෙනුවට ඔලිව් ඔයිල් වැනි හිතකර ශාකමය තෙල් වර්ගයක් භාවිත කිරීම සහ කලින් සකස් කරන ලද ආහාර සහ අධික ලුණු, තෙල් සහ පිටි අඩංගු ආහාර ගැනීමෙන් වැළකීමෙන් අහිතකර කොලෙස්ටරෝල්වලින් සිදුවන හානිය වළක්වා ගත හැකිය.

තුෂාරා සන්දනායක

මාතෘකා