චරිතයක් අහිමි නාටකයක්

 ඡායාරූපය:

චරිතයක් අහිමි නාටකයක්

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

ඔයා තනියෙන් නේද හිටියෙ? ඔහු ඇගෙන් ඇසීය.

නැ‍ඟී සිටි ඕ, දොර දෙසට ගමන් කළාය.

නවතින්ඩ. ඔහුගේ වචනයෙන් ඇය නැවතුණාය.

ඔහුට අකීකරු වන්ට තමාට බැරි බැව් ඇය දන්නීය. ඇය ආපසු ගොස් හිඳගත්තාය. එහෙත් වෙනත් සෝපාවකය.

අද ගරිල්ලා සටන් කරන්ට බැරි තරමට මම හුඟක් වයසට ගිහින්. නැ‍ඟී සිටි ඔහු පැමිණ ඇය සිටි ආසනයෙහි හිඳගත්තේය. ඔහු සිය දෑතින් ඇය අල්ලාගත්තේය.

කරුණාකරල එපා. ඒ වචන ඇගේ පපුව තුළින් ගලා ආවේ හුස්ම හිර වූ කලෙක මෙනි.

ඔහු කිසිසේත්ම සැලුණේ නැත ඇය දඟලන පොර බදන අතර ඔහු තම කාම තෘප්තිය විඳගත්තේය. ඔහු සීරුවෙන් තම මාර්ගය පාදා ගති. දෙවියන් වහන්සේ හැම කුරුල්ලෙකටම කෑම සපයල දෙනව. නමුත් දෙවියන් වහන්ස ඒ කෑම කූඩුව ඇතුළට ගෙනැල්ල දාන්නෙ නෑ. ඔහු එසේ කියනු ඇයට ඇසුණි. එළියට ඇවිදිල්ල ඒ කෑම අහුලගන්ඩ ඕනෑ.

දූවිල්ලට යන කන්ම මං ගමන් කරන්නෙ මගෙ පාරෙ.

එයට ප්‍රතිචාරයක් නොදැක්වූ හෙතෙම ඇයට කාම ප්‍රහාර දීමේ කාරියෙහි නිරත විය.

ඇයගේ සිරුර වැසී ගොසිනි. මනස වෙන අතකය.

ඔහුගේ දහදිය බිඳු ඇයගේ නාසය කෙළවරින් පෙරී අවුත් කම්මුල් දිගේද කන් දෙසටද හිසකේ දෙසටද ගලා ගියේය. ඇයගේ ප්‍රතික්ෂේපයෙන් ඔහු සැලුණේ නොවෙයි. ඇය තරයේ අල්ලාගෙන ඔහු ඇයට පැන පැන කාම ප්‍රහාර එල්ල කෙළේ. ඇය මෙල්ල කරන්නට මෙනි.

අපි රහසේ හමු වුණා.... සිය වචන ගිල ගනිමින් ඇය හදිසියෙන්ම හඬන්ට වූවාය. අපි අන්ධකාරෙ හමු වුණා. අපේ සරීරවල සම දිලිසුණා. අපේ සරීර ආශාවෙන් පිම්බුණා. අපේ මාංසය නොඉවසිල්ලෙන් දැවී ගියා. නමුත් මං කොහොමද දන්නෙ.... නමුත් මේ ගමන..... අපේ යෞවනයේ ගින්න ගිලගත්තු මේ ගමන.... ඉදිරියට යන්න තරම් වටින ගමනක්ද කියල....

ඔහු සිය දකුණත ඔසොවා ඇගේ කට වැසීය. ඇගේ සිරුරේ රිද්මයෙන් ඔහුගේ සිරුර සැලුණි.

හදිසියෙන්ම ඔහු පෙරළී බිම ඇද හැළුණි. හරියට කැඩුණු බයිසිකලයක් වගේය.

අමුතු ඉරියව්වක පැවැති තම සිරුර දෙස බලන විට ඇයට දැනුණේ තමා සිටින්නේ ඔරලෝසුවක් තුළ කියාය. තම සිතිවිලි අනාගතය දෙසට දිව යනු වළක්වාලන්ට ඇය වෑයම් කළාය.

සවස් භාගයේ ආලෝකය දිගටම පැවැත්තේ කාමරය තුළ ඍජුකෝණාශ්‍රයන්ද ත්‍රිකෝණයන්ද මවාපාමිනි. බර්ගන්ඩි බුමුතුරුණෙන් නිකුත් වූයේ දුම් සුවඳය. බිත්තිය මත වූ පැරණි පියෝනි සිත්තම් අවතාර වෙස් ගති. තාච්චියක් මදින්නාක් වැනි හඬක්ලු මුළුතැන්ගෙයි එහා කොනේ පොළොව යට පිහිටි නළයකින් නිකුත් වනු ඇසුණි.

ඇය දිගු වේලාවක් සවන් දීගෙන සිටියාය. ඇයට දැනුණේ නළ දිගේ ගලායන වතුර තමාගේ හිස් කබල තුළින් ගලා යන්නා සේය. ඉනික්බිතිව අඩි ශබ්දයක් ඇසුණේය. ඒ, සේවයෙහි යෙදී සිටි මුර භටයාගේය. ඉදිරියට එන අඩි ශබ්දය සැණින් නැවතුණි. මහ හඬකි. කිසිවක් බිම වැටුණි. බරැති කිසියම් බෑගයකි. මුරභටයා දුවන්ට වූයේය. ඉන් පසුව මිනිසුන් දෙදෙනකු කතා කරන හඬක් නැඟුණි. පණ ඇති මාළු ගෙනැවිත් සිටින ට්‍රක් රියදුරෙකි. ඔහු පැමිණ සිටින්නේ වැරදි තැනකට බැව් මුර සෙබළා දැනුම් දුන්නේය. මුළුතැන්ගෙයි ප්‍රධාන දොරටුව වෙතට යන්නේ කෙසේදැයි රියදුරු විමසීය. මුරභටයා ඔහුට පිළිතුරු දුන්නේ තද ශාන්-ඩොන් ව්‍යවහාරයෙනි. තමාට විවේක කාමරය පාවිච්චි කළ හැකිදැයි රියදුරු ඇසීය. ඔහුට එය කරගන්ට සිදු වන්නේ එළියේ දී යැයි මුරභටයා පිළිතුරු දිනි. ක්‍රමයෙන් ශාලාවට යන මගෙහි වූ හඬ වියැකී ගියේය.

කොයි තරම් අමුතුද?

තමා මා ඕ කසාද බැඳල දැන් අවුරුදු දාහතකි.

අප කසාද බැඳගත්තු රහස මොකක් කියලද ඔයා හිතන්නෙ? මා ඕ එසේ ඇසුවේ ඇයගේ සිතිවිලි වටහාගත්තාක් මෙනි. ඒ අප එකිනෙකාට වශීවීම නිසා. එක කාලෙකදි අප අපේ ලස්සන දැක්කෙ අනෙකාගේ මුහුණ නමැති කැඩපතින්. අපි අපටම භක්ති ගී ගායනා කරගත්තා.... ඒක තමයි සිද්ධ වුණේ.

නැගිටිමින් ඔහු යට ඇඳුම් ඇඳගත්තේය. තමාගේම සිගරැට් කොටයෙන් තම කොට්ටය පුච්චාගත්තු දුම්බොන්නෙක්. ඔහුගේ ස්වරයෙහි ගැබ්ව තිබුණේ උත්ප්‍රාසයයි.

ඔබ වැරදියි. ඇය අපරීක්‍ෂාකාරීව කීවාය.

අපේ ජීවිතේ ගත කෙරුණෙ වැඩවසම්වාදීන්ට චියං කායි - ෂෙක්ට ජපනුන්ට අධිරාජ්‍යවාදීන්ට මහී මාතාවට එකිනෙකාට විරුද්ධව යුද්ධ කරන්ට. අතීතය ඔහේ ගියාවෙ ඔබේ අනාගතය සම්බන්ධයෙන් මට දෙන්ඩ පුළුවන් අවවාදය තමයි විලෝ මලක් කුරුල්ලකුට වඩා ඉහළ පියාඹනව. මොකද දන්නවද එයට සුළඟත් උදව්ව තියෙනව.

ඔබත් මතක තියාගත යුතු තවත් කාරණයක් තියෙනවා. ඔබයි මමයි එකම කොළයක දෙපැත්ත වාගෙ. ඒක පලලා වෙන් කරන්ඩ බැහැ. ඔබේ දෙවියන්ගෙ වැනි පින්තූරෙ රඳා පවතින්නෙ මා එය නියම තැන රඳවාගෙන තියෙන නිසා.

ඔහේගෙ නාටකේ ඔහේට කැමති ආකාරයකට නටාගන්ඩ. දොර දෙසට ගමන් කළ ඔහු මඳකට නැවතුණි. නමුත් ඒ නාටකේ මට කිසිම චරිතයක් පවරන්ඩ එපා.

ඔහු තදින් දොර වසාගෙන පිට විය.

ඒ හඬ ශාලාව තුළ ප්‍රතිරාව දුන්නේය.

පරිවර්තනය | ඩබ්ලියු. ඒ. අබේසිංහ

මාතෘකා