නායක ආර්යාවගේ භූමිකාව

 ඡායාරූපය:

නායක ආර්යාවගේ භූමිකාව

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමු වී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

පරිවර්තනය | ඩබ්ලියු. ඒ. අබේසිංහ

තිර රෙදි පහත හෙළා ඇත. ඇගේ කාමරය තුළ ගාර්ඩිනියා මල් සුවඳ තදින් දැනෙන්ට වෙයි. මාසයකට පමණ පෙර ඇය විසින් ප්‍රංස මේසයක්ද ඊට කැපෙන පුටුද ෂැන්හයි නුවරින් ඇණවුම් කරන ලද්දේය. එහෙත් ඒ ගෘහ භාණ්ඩ ගෙනැවිත් බාරදුන් පසුව ඇය ඒවා අතහැර දැමුවාය. ඒ වන විට ඇගේ මනස වෙනස්ව තිබිණි. ඇගේ උමතුවේ ආරම්භය එයයි. ඒ උමතුව දැන් සිය ගමන අරඹා ඇති බැව් ඇයට දැනෙන්නේ නැත.

කැඩපත තුළින් ඇය දකින්නේ. පිටුපස කුටියක වෙසෙන අනියම් බිරිඳක අමතක කර දමන විලාසයයි. ඇය සී-ෂෙන් බවට පත් වෙමින් සිටින්නීද? ඇය කිසි දිනෙක සී-ෂෙන් දැක ඇත්තේ නැත. ඇය සී - ෂෙන් ගැන විවිධ විස්තර තොරතුරු අතීතයේ එක් අවස්ථාවකදී වගතුග අසා ඇත්තේය. කුරුලු මුවක් ඇති වයසක මැහැල්ලක්. පිදුරු බඳු කෙස් වැටියක්ද ඇති මැහැල්ලක්. සී-ෂෙන් පිළිබඳව ඔහු තුළ ආදරයක් ඇතිදැයි සොයා බලන්ට ඇය උත්සුක වූවාය.

තණගොල්ල හරහා හමා යන මෘදු සුළඟක්. ඒ, මා ඕගේ විවරණයයි.

ඇයට කතා කරන්ට අන් කිසිවෙකුත් නැත්තේය. භග්නාපේක්ෂණයේදී ඇය හැරෙන්නේ කෑන් ෂෙන් දෙසටය. එය අන්‍යෝන්‍ය හුවමාරුවක් බැව් ඇය ඔහුට දැනගන්ට හරින්නීය. ඔහුට ඇය අවශ්‍ය වන හැමවිටෙකම එයම කරන්ට ඇය ඔහුට පොරොන්දු වන්නීය. ඒ ගනුදෙනුව ඔහුට අභිමතය. චීනයේ ජාතික ආරක්ෂක බියුරෝවේ ලේකම්වරයා හැටියට ඔහුට උසස්වීමක් ලබාදී ඇත්තේය. ස්ටාලින්ගේ අතවැසියා. මා ඕ ඔහු හඳුන්වන්නේ "ජනරජයේ මාංසයට කැවී ඇති වානේ දත්” හැටියටය. ඔහු ඇයගේ ගැලවුම්කාරයාය. ඇයට ඉතා වැදගත් තොරතුරු සපයන හෙතෙම අවවාද දීමෙන් ඇයට මඟපෙන්වන්නේද වෙයි. අවුරුදු දහයකට පසුව ඔහු විසින් ඇය වෙත නම් ලැයිස්තුවක් බාර දෙනවා ඇත. එහි ඇත්තේ සතුරන්ගේ නම්ය. ඔහු ඇයට ඒත්තු ගන්වන්නේ ඇය මුලදී ඒ සතුරන් විනාශ නොකළොත් ඔවුන් විසින් ඇය විනාශ කරනු ලබන බවය. ලැයිස්තුවේ ඇති නම්වලින් ඇය කම්පනයට පත් වනු නියතය. ඒ නම් අතර කොංග්‍රසයේම තුනෙන් දෙකක් තරම් වෙයි. ක්‍රියාත්මක වනු සඳහා ඔහු ඇය ධෛර්යය ගන්වන අතර ඉක්මනින් ක්‍රියා කරන්ටද ඔහු ඇයට උපදෙස් දෙනවා ඇත. ඇය සොල්දාදුවකු බවට පත්ව තමාම සටනට අවතීර්ණ වන්නීය. ඒ අනෙකක් නිසා නොව මරණ භීතිය නිසාය. ඔහු විසින් අත් අකුරෙන් ලියන ලද ලැයිස්තුව අනුව ඇය කටයුතු කරනවා ඇත. ඔහු විසින් ඒ නම් රවුම් කර ඇත්තේය. අතිශයින්ම රහසිගතයි. ජියෑන් චින් සහෝදරියගේ ඇස්වලට පමණි. කොංග්‍රසයේ මිනිස්සුම එකසියපහකි. ඊට අමතරවල ප්‍රාදේශීය නියෝජිතයින් අනූවකි.

පනස් ගණන්වලදී මගේ දැනමුත්තා වූයේ කෑන්-ෂෙන්... අපි එකිනෙකාට හැරමිටි වෙමු. නැඟිටින්ටත් නැඟිටගත් පසුව ඉහළටම යන්නටත් අපි එකිනෙකාගේ හැරමිටි වෙමු. අනෙකා නැතිව අපට වැඩකරන්ට බැරිය. අප සිටින්නේ ගනුදෙනුවකය.

මම සී-ෂෙන් නොවෙමි. මම අස්වාභාවික ලිංගික සම්බන්ධතා ඇති තැනැත්තියකද නොවෙමි. මම ජීවිතය රසවිඳ ඇත්තෙමි. එය මට තවදුරටත් ඕනෑය. මා ඕ දිගටම මාගේ බලාපොරොත්තු කඩ කරන්නට කටයුතු කරයි. ඔහුට අවශ්‍යව ඇත්තේ මා අධිරාජ්‍යයාගේ පිටුපස මිදුලේ වැඩට යවන්නටය. එසේ යැවීමෙන් පසුව මා සතුටින් සිටිනු ඇතැයි ඔහු අපේක්ෂා කරයි. මුලදීම මට නායක ආර්යාවගේ භූමිකාව පුදන ලද්දේ ඔහු විසිනි. එය අපගේ ගනුදෙනුව විය. ඒ ප්‍රතිඥාව කඩා ඇත්තේ ඔහුය. එහෙත් ඔහු මට ආදරය නොකරන බවක් හෝ අපි දික්කසාදයක් කරගනිමු කියා හෝ කියන්නේ නැත. මෙය වඩාත්ම නරකය. මන්ද යත් ඔහු එය හිතුවක්කාර අන්දමින් කිරීමය.

ඔහු විසින් මගේ අනන්‍යතාව පැහැරගෙන ඇත්තේය. පාරේ යන මිනිසුන්ගෙන් අහන්න කවුද පළමු වැනි ආර්යාව කියා. දහදෙනෙකුගෙන් නවදෙනෙක්ම එය දන්නේ නැත. ජියෑන් චින්නාමය ඔවුන්ට හුරු නමක් නොවේ. කිසිවකු විසින් පළමු වැනි ආර්යාවගේ පින්තූරය පත්තරවල දැක නැත්තේය. ඒක මා ඕගේ අදහස නොවේ යයි කියනවා නම් ඒ මා රවටා ගැනීමක් - ආත්ම වංචාවක් - පමණි.

ගැහැනියකගේ ලොකුම බලාපොරොත්තුව නම් ආදරය කරනු ලැබීමය. ඊට වඩා ගැඹුරු සත්‍යයක් ඇත්තේ නැත. ජීවිතයේ අත්‍යවශ්‍ය හරය මගෙන් එළියට ඇද ඉරා දමා ඇත්තේය. මම සී-ෂෙන් ගැන සිතන්ට වන්නෙමි. ඇගේ දුක - කනස්සල්ල - හඳුනාගන්නා මම මගේ සිහි බුද්ධිය මත එල්බගනිමි. තහනම් නගරය උමතුභාවයට පත් වූ බොහෝ දෙනෙකුගේ නිවාස ස්ථානය නොවීද? මා ඕගේ භූමියෙහි ඇවිදගෙන යන මම ගැහැනුත් මිනිස්සුත් පුරාණ අවධියේ නපුංසකයින් මෙන් කටයුතු කරන ආකාරය බලා හිඳිමි. බල්ලන් මෙන් ඔවුහු ඉව අල්ලති. අවදිව සිටින කාලයෙන් හැම තත්පරයක්ම ඔවුන් ගත කරන්නේ තමන්ගේ අධිරාජ්‍යයා සතුටු කරන්නටය. පිනවන්නටය. තමන්ගේ අනියම් බිරිඳ එළවා දමන්ට අධිරාජ්‍යයා සූදානම් කවර මොහොතකදැයි ඔවුහු දනිති.

මගේ තත්ත්වය ගැන මම දනිමි. මගේ භූමිකාවට මාංසයක් නැත්තේය. ඒ කොහොම වෙතත් මා වැඩගන්ට සූදානම් නම් මායාව - රැවටිල්ල - මා වෙත තවත් ඉතිරිව තිබේ. මා තවමත් මා ඕගේ නිල බිරිඳය. මා වේදිකාව මතට ගොඩවිය යුත්තේය. දීප්තිය නැතත් මගේ ඉහට උඩින් තවමත් එළිය වැටෙයි. මගේ නිල ඇඳුම ඉවත් කරන්නට මා ඕගේ මිනිස්සු වෑයම් කර ඇත්තාහ. ඔවුන් මගේ ඇඳුම අතින් අදිනු මට දැනෙයි. නමුත් මා ඉඩ දෙන්නේ නැත. මම මගේ නිල තත්ත්වයෙහි එල්බගෙන සිටිමි. මගේ චරිතයේ ඉන්ද්‍රජාලය වියැකෙන්නට මම ඉඩ නොතබමි. මට මඟපෙන්වන්නේ බලාපොරොත්තුවයි. මා පොලඹවාලන්නේ පළිගැනීෙම් චේතනාවයි.

කෑන්-ෂෙන් කියන්නේ පීඩනයට ගොදුරු වූ මිනිහෙකි. දෑතින්ම අකුරු ලිවීමේ ශාස්ත්‍රය දන්නා තැනැත්තකු හැටියට කෑන්-ෂෙන්ට ප්‍රසිද්ධියක් ඇත්තේය. ඔහු පච්චගල්ද ලෝකඩ භාණ්ඩද ගල් කැටයම්ද එකතු කරයි. වරක් ඔහු ප්‍රකාශ කෙළේ මහා කවියකු සහ අක්ෂර ලේඛන විද්‍යාවෙහි සමතකු වූ ගුවෝමවුරවුගේ ලේඛනය ”තමගේ කකුලෙන් ඇන්ද දේකටත් වඩා නරක”ය කියාය. එය අතිශයෝක්තියක් නොවේය. කෑන්-ෂෙන් කලාව ගැන කතා කරන විට ඔහු එකී විෂයයන් පිළිබඳ හැම කුඩා විස්තරයක් පවා දත් විශාරදයෙකි. ඔහුගේ මුඛය උත්කර්ෂවත් කියමන් ගලා හැළෙන ගංගාවකි. එවන් අවස්ථාවන්හිදී ඔහුගේ සිරුරෙහි රැලි මැකීයන්නේ හිරු දුටු තණපත් මත ඇති පිනි බිඳු මැකී යන්නාක් මෙනි. කෑන්-ෂෙන් ජීවිකාව උදෙසා කරන්නේ කුමක්දැයි කිසිවෙකුට අනුමාන කරන්ටවත් බැරිය.

මාතෘකා