සංස්කෘතික විප්ලවයේ අත්පොත

 ඡායාරූපය:

සංස්කෘතික විප්ලවයේ අත්පොත

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමු වී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

පරිවර්තනය | ඩබ්ලියු. ඒ. අබේසිංහ

1966 ජුනි. මගේ ගිනිගෙන දැවෙන ගිම්හානය. මාර්ගය රළු වුවද අනාගතය දීප්තිමත්ව පෙනෙයි. අතීතයේදී මගේ නමට ආධිපත්‍යයක් තිබුණේ නැත. ඔපෙරා නිෂ්පාදකයන් සහ විචාරකයන් මට දැක්වූයේ අල්ප ගෞරවයකි. ඔවුහු මගේ පිටපත් නැවත ලියූහ. හැම පද පේළියක්ම - හැම ස්වරයක්ම - වෙනුවෙන් මට සටන් කරන්ට සිදු විණි. සාමාන්‍ය මිනිසුන් කල්පනා කළේ මා, මා ඕගේ ගෘහණිය කියාය. චුන් - කුවියා ඕට බලය තිබුණු ෂැන්හයිහිදී හැරෙන්ට කිසිවකු මා ලියූ දෙයක් පළ කළේ නැත. දැන් මට මා ඕගේ සහයෝගය ඇති හෙයින් හැම දෙනාම මගේ අවධානය ලබාගන්ට පොරකති. පත්තර යනු මගේ අදහසේ හැටියට නම් ළදරුවෙකි. තන පුඩුවක් දික් කරන කවරකුට මුත් අම්මා කියා කියති. හරිම බාලය.

මා ඕගේ නමින් මම ජාතික උත්සවයක් සංවිධානය කරමි. විප්ලවවාදී ඔපෙරාවන්ගේ සැණකෙළිය. මම ප්‍රබල ඔපෙරාවන් තෝරාගෙන ඒවා මා ඕගේ කාර්ය සාධනයට ගැළපෙන අයුරින් සංස්කරණය කරමි. දක්ෂ නාට්‍ය ශිල්පීන් ලවා එකී නාට්‍යවල උචිත කොටස් තෝරාගෙන ඒවා ඉහළ ප්‍රමිතියක් ඇති විචිත්‍ර නිර්මාණ බවට පත් කරමි. මේ වගේය. කොටි කන්ද බුද්ධියෙන් ජයගැනීම ෂා පවුලේ පොකුණ. මෙම ඔපෙරාවන්ට මගේ අත්සන යොදන අතර ඒවායේ නළුවන් තෝරාගැනීමේ සිට ගායකයකුගේ ස්වරෝච්චාරණය දක්වා වන සියලු කුදු මහත් කටයුතු මම පෞද්ගලිකවම අධීක්ෂණය කරමි.

ඉක්මනින් ග්‍රහණය කරගන්නෝ මෙන්ම ඇට්ටර මනස් ඇත්තෝද වෙති. මට ඒ හැමදෙනා ගැනම බලාගන්ට සිදු වෙයි. මගේ සතුරාගේ සෙවණැල්ල නොවැටෙන එකද දිනක් ඇත්තේ නැත. විරෝධය බලවත් වන විටද මගේ ව්‍යාපෘතිය අනතුරට මුහුණ පා ඇති විටද මම දුරකථනයෙන් මා ඕ අමතමි. අද උදේ මගේ නාට්‍ය රචකයන් දෙදෙනකු ඔවුන්ගේ කටයුතුවලින් ඉවත් කරගෙන ඇත. මගේ සතුරාගේ නියෝගයක් මත ඔවුහු රැඳවුම් නිවසක දමා ඇත්තාහ. හේතුව අපැහැදිලිය ”ඔවුන් ස්වකීය හදවතින් සහ ආත්මයෙන් ජනතාවට සේවය කර නැත්තේය. හරියටම මෙකී විරෝධය බාරව ඉන්නේ කවරකුදැයි මට අදහසක් දක්වන්ට බැරිය. සියල්ලම කෙරෙන්නේ ශිෂ්‍යයන් මාර්ගයෙනි. මෙහි යුද කලාපයක් ඇත්තේය. මගේ සතුරාට මුහුණු රාශියකි. ශිෂ්‍යයෝ අවශ්‍ය කාර්යයන්හි යොදාගැනෙති.

ප්‍රමාණවත් උදවු ලබාදීමෙන් මා ඕ, මා සනසයි. සහයෝගතා ව්‍යාපාරයක් දියත් කරන්ඩ. ඔබේම බලකාය හදාගන්ඩ. විශ්වවිද්‍යාලවලට යන්ඩ. ගිහින් මා වෙනුවෙන් මහජන රැලි අමතන්ඩ. අවසාන අරමුණ වන්නේ ශිෂ්‍ය ප්‍රජාව අපේ පැත්තට දිනාගැනීම.

දින තිස්හතක සැණකෙළිය අතිවිශාල සාර්ථකත්වයකින් නිම වෙයි. පැමිණි ජන සංඛ්‍යාව තුන්ලක්ෂ තිස්දහසකි. එය වඩාත් උත්කර්ෂවත් කරනු උදෙසා අවසාන උත්සවයට මා ඕ සහ ඔහුගේ නව කැබිනට් මණ්ඩලය සහභාගි වන්නේය. මම තණකොළ පැහැගත් අලුත්ම නිල ඇඳුම ඇඳගෙන මා ඕ ළඟින්ම සිටගෙන අත්පොලසන් දෙමි. තිරය පහතට වැටෙන සඳ, මම ප්‍රීතියෙන් කුල්මත්ව හඬා වැලපෙමි. හැම කොමියූනයකම, හැම කම්හලකම, හැම විශ්වවිද්‍යාලයකම සහ හැම වීදියකදීම, ”සංස්කෘති විප්ලවයේ අත්පොත” බෙදා දෙනු ලැබීම හේතුවෙන් මගේ නායකත්වය තහවුරු වෙයි. මගේ නියෝග මත ශිෂ්‍යයෝත් කම්කරුවෝත් ගොවීහුත් පාලකයන්ට අභියෝග කරති. මහජන රැලිවලදී මම මා ඕගේ කවියක් මයික්‍රෆෝනය තුළින් ගායනා කරමි.

 

සීත සමයේ හිම තලාවේ

නොබිය ප්ලම් කුසුමන් පිපේ

දුකින් පීඩිත මැසි මදුරු කැල

මිදුණු හිම මත මිය ඇදේ

විරෝධය නවතින වගක් නැත. උපසභාපති ලියු තමාගේම කණ්ඩායම් මඟින් ප්‍රතිප්‍රහාර සංවිධානය කරයි. ඔහුගේ දූතයන් හඳුන්වනු ලබන්නේ ”වැඩ කණ්ඩායම” හැටියටය. ඔවුන්ගේ අභිප්‍රාය නම් ‘ළැව්ගිනි’ නිවා දැමීමය. මා ඕ මැතිනිය විනාශ කිරීමය.

එහෙත් ඇය අවුලට පත් නොවන්නීය. මා ඕ විසින් ලියුට පහරදීමේ තම අභිලාෂය තහවුරු කොට ඇත්තේය. මා ඕ අධිෂ්ඨාන කර ඇත්තේ උපසභාපති ලියු ගින්න මතට දමන්නටය.

ෙපර දින රැයේ ඇය සිහිනයක් දුටුවාය. ඇය විසි වී වැටුණේ මා ඕගේ දෑතටය. ඇය අනුකම්පා උපදවන ලෙස හඬන්ට වන්නීය. හරියට පොඩි දරුවකු පරක් කරන්නාක් මෙන් මා ඕ ඇය සනසාලීය. ඔහුගේ කමිසය ඇගේ කඳුළින් පෙඟුණි.

අද උදයේ ඔවුහු එකතුව පාතරාසය ගනිති. දෙදෙනා එකිනෙකා ඉදිරිපිට සිටීම ආදරය ප්‍රකාශ කරන එක් මඟක් බවට පැමිණ ඇත්තේය. සිහිනය ගැන ඇය ඔහුට කියන්නේ නැත. ඔහුගේ මුහුණ ශාන්තය. ඉවසිලිවන්තය. ඔවුහු නිහඬව බුදිති. ඔහු උණු ගම්මිරිස් සමඟ පාන් සහ කැඳ බුදියි. ඇය කර කළ පානුත් පලතුරුත් කිරිත් අහරට ගන්නීය. සේවකයෝ සිටු වූ ගස් මෙන් හිටගෙන සිටිති. හාම්පුතුන් අහර බුදින අයුරු ඔවුහු බලාගෙන සිටිති. තම නිවසේදී නම් ඇය විසින් ඔවුන් එතැනින් පිට කරනු ඇත්තේය. මා ඕට ගාණක් නැත. තමා අහර බුදින කාමරයේ හැම මුල්ලකම මුර භටයන්ද සේවකයන්ද සිටගෙන සිටිනු දකින්ට හේ කැමතිය. සිය මුර සෙබළා ඉදිරිපිට ශරීර කෘත්‍යය පවා ඔහුට ලජ්ජාවක් නැත.

ඉතින් ශිෂ්‍යයොත් එක්ක කාරණා කටයුතු කොහොමද? තමාගේ ජින්සෙන් සුප් එක ශබ්ද කරමින් බොන අතර ඔහු ඇයගෙන් විමසයි.

මං ක්වින්ගුවා විශ්වවිද්‍යාලයෙන් තරුණ හාදයෙක් තෝරාගත්තා අවුරුදු දාහතක ජීව විද්‍යා ශිෂ්‍යයෙක්. එයාගෙ නම කුආයි ඩා-ෆු.

කුආයි ඩා-ෆු ගැන විස්තර කියමින් මම සතුටක් ලබමි. මා ඔහු ගැන විස්තර කරන්නේ මගේම පුතකු හැටියටය. එයාට තියෙන්නෙ කෙට්ටු මුහුණක්. උද්යෝගිමත් චරිතයක්. එයාට තියෙන්නෙ ලොකු නාසයක්. එයාගෙ තොල් මට මතක් කරන්නෙ වියළී ගිය ගංගා පත්ලක්. ඒ ප්‍රකාශයට මා ඕට හිනා යයි.

කියන්ඩ. ඔහු කියයි. කියන්ඩ.

මාතෘකා