අතීතය නැවත නැවතත්

 ඡායාරූපය:

අතීතය නැවත නැවතත්

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමු වී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්, චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

තවත් වතාවක් යූජි ආර්යාව පැමිණ සිටින බවක් ඇයට හැඟෙයි. අභිවන්දනය ආපසු පැමිණ ඇත්තේය. යළිදු ඇය දර්ශනයට පිවිසෙන්නීය. ෙප්‍ර්මවන්තයෝ අටපට්ටම් මන්දිරයේ බුද්ධ ප්‍රතිමා වටේ ගමන් කරති. නවසියයක් වන නිල්ල හරිත සහ කහ පැහැ ගත් දෙවිවරුන් සමූහය දර්ශනය කරමින් වටේ කැරකෙති. පෙම්වත්තු තවදුරටත් එකිනෙකාගේ දෑතෙහි රැඳී නොසිටිති. ඔවුන්ගේ තොල් පෙති එකට ස්පර්ශ නොවෙයි. එහෙත් ඔවුහු එකිනෙකා අමතති. ඒ කතාබහට සවන්දීගෙන සිටිති. තමන් වටා සිටින අසීමාන්තික සතුන් ගැන භූමිය තුළ අන්ධකාරයෙහි ගැලුණු සත්ත්ව ගණයා ගැන, භයානක කෘමීන් ගැන, මී මැසි සමූහයාගේ මහා ගුම්නද ගැන ඔවුන් නිහඬව එක්වන ආකාරය ගැන මරා ගන්නා හැටි ගැන මාරුවෙන් මාරුවට කතා කරති.

දෙවියො තමයි දන්නෙ, මම ඔබ ගැන මොන තරමට හිතනවද කියල, ඇය නාට්‍යාකාරී උස් හඬකින් පවසයි. ඒ පද පේළියෙහි ඇගේ ආත්මයම කිති කැවෙන අමුතුම ලාලිත්‍යයකි. සභාපතිතුමනි, මට අණ කරන්ඩ. මෙන්න මගෙ අසිපත.

තවදුරටත් ඒක ගායනයක් නොවේය. තවදුරටත් හුදෙකලා ජීවිතයක් නොවේය මගේ සිරුර මේ තරම් තරුණ වී ඇති වගක් මීට පෙර කිසි දිනෙක මට දැනී නැත. අෙප්‍ර්ල් නව වැනි දින නගරාධිපති පෙන් ෂෙන්ගේ අගක් මුලක් නැති වාර්තාවට කන්දීගෙන සිට මට එය එපා වුණි. එය කමකට නැති ස්වයං විවේචනයකි. මම එය කෑන් ෂෙන්ට සහ චෙන් බෝ - ඩාට බාරදුනිමි. චෙන් බෝ - ඩා යනු ඝාතක විචාරකයෙකි. මවිසින් ඔහු බඳවා ගන්නා ලද්දේ මෑතකදීය. ඔහු දැන් බීජින්හි මාක්ස්වාදය සහ ලෙනින්වාදය පිළිබඳ ආයතනයේ අධ්‍යක්ෂවරයාද වෙයි. පෙන් ෂෙන් සම්බන්ධයෙන් චෙන් බෝ - ඩා විසින් පිළියෙල කරන ලද වාර්තාවල ”5. 16දැනුම්දීම” යනුවෙන් නම් කොට මා ඕ වෙත යවමි. මේ වන විට උපසභාපති ලියු ඇද වට්ටන්ට මා ඕ විසින් තීරණයක් ගෙන ඇති බවක් මට හැඟෙයි. ලියුගේ මුල්ම පෙළේ මිනිහා වන පෙන්ට දඬුවම් කිරීම මා ඕගේ පළමු වැනි පියවරයි.

බලාපොරොත්තු වූ පරිද්දෙන්ම, වාර්තාව ගැන අදහස් දක්වන මා ඕ සටන ප්‍රසිද්ධියේ කළ යුතු බවට නියෝගයක් දෙයි.

මැයි 4 වැනිදා නගරාධිපති පෙන්ගේ ඇද වැටීම ගැන අවසන් තීරණයක් ගන්නා රැස්වීම පැවැත්වෙයි. මෙම රැස්වීම කැඳවන්නේ මා ඕ නොවේ. එය කැඳවන්ට බලකර ඇත්තේ ලියුටය. එයට විරුද්ධ වන්නට ඔහුට ඉඩක් දී නැත. මා ඕට විරුද්ධව කැරලි ගසන්ට ලියුට ශක්තියක් ඇත්තේ නොවෙයි. මේ රැස්වීමේදී ලියු සිටින්නේ මලානිකවය. ස්වකීය මිත්‍රයාට ප්‍රසිද්ධියේ චෝදනා නඟමින් කතා කරන ලියු දිගට හුස්ම අදින්ට වෙයි. ඔහු කියවන්නේ දේශපාලන මණ්ඩලයේ නාමයෙනි. ඔහු පෙනී සිටින්නේ අසීරුවෙනි. පෙන් ඉතා විශ්වාසවන්ත සේවකයකුද තම වැඩපිළිවෙළෙහි කැප වුණු සහායකයකුද වී ඇත්තේය.

 

ඊළඟට තමා බැව් උපසභාපති ලියු හීනෙකින්වත් හිතුවේ නැත. මා ඕ කළාක් මෙන් ඔහුද ”රාජධානි තුනක ෙප්‍ර්ම කතාව” කියවන්ට කාලය යෙදුවේ නම් තම නායකයාගේ සැලසුම් ගැන කලින් දැනගන්ට ඉඩ තිබුණි.

මා ඕ සතුටු කරනු සඳහා මැයි 08 වැනි දින ”ගා ඕ ජු - සැර ගිනි හුල” යන පන්හිඳ නාමයෙන් මම ලිපියක් පළ කරමි. එහි සිරස්තලය වන්නේ ”කොමියුනිස්ට් විරෝධී පක්ෂ කණ්ඩායම දෙසට - පහර දෙනු”යන්නය. අවුරුදු තිහක් තුළ ඒ වූකලී මගේ මුල්ම ප්‍රකාශනයයි. මෙම ලිපිය ජනතාවගේ කතාබහට ලක්වෙයි. අපේ ජීවිත පූජා කර සභාපති මා ඕ රැකගනිමු... යන සටන් පාඨය හැම තැනින්ම ඇසෙන්නට වෙයි. සතුට නිසාම මට නින්ද යන්නේ නැත. මම මගේ ඉරණම මගේ දෑතට ගෙන සිටිමි. ප්‍රතිඵල ලැබී ඇත්තේය. සතුට පළ කරනු සඳහා මේ උදේ මා ඕ දුරකථනයෙන් මා ඇමතීය. තමාගේ ජින්සන් එකෙන් ටිකක් සප්පායම්වන්ට මට එන්නැයි ඔහු පවසයි. හවස්වරුවේද ටැලිපෝනය නාද විය. මෙවර ඔහුගේ ලේකම්වරියගෙනි, රාත්‍රි භෝජනය සඳහා ඔහු මට ආරාධනය කරයි. නාහ්ද ගෙදර පැමිණ ඇතැයි පණිවිඩයෙන් කියවෙයි.

මට අඳින්ට එකක් නෑ, මම කීවෙමි.

ඒ කියන්නෙ ‘බෑ’ කියලද? ලේකම්වරිය අවුලට පත්ව සිටින්නීය.

මගේ පුටුවෙහි හිඳගත්වනම, සිරුර ගැහෙන බැව් මට දැනෙයි. අන්තිමේදී ඔහුට මා අවශ්‍යව ඇත්තේය. එක දුරකථන පණිවිඩයෙන් අවුරුදු ගණනාවක අමනාපය - නොරිස්සීම - දියව ගොසිනි. මට පිස්සුද? ඔහු ආයෙමත් මා මඩවනවාද? එහෙමත් නැත්නම් ඒ ඔහුගේ වයසට යාම පිළිබඳ කාරණයක්ද? මා දවල් හීන දකින්නේද? ඔහු දීර්ඝ ජීවන අභ්‍යාස අතහැර නැත. තවමත් නිදාගන්නේ තරුණ කෙල්ලන් සමඟය. එහෙම වුණත් ඔහුට මා සමඟ යළිත් එකතු වන්නට ඕනෑය, බරපතළ ලෙසම ඕනෑය.

පරිවර්තනය | ඩබ්ලියු. ඒ. අබේසිංහ

මාතෘකා