නදියක හැපෙන කුණාටුව

 ඡායාරූපය:

නදියක හැපෙන කුණාටුව

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

යූ කුවෙයි ඇයට ළං වී ඇය තුරුලු කරගනියි. තමාට ඇගෙන් වෙන් වන්ට නොහැක්කේ යයි ඔහුට දැන් වැටහෙයි. ජිනාන් සිට පැමිණි යුවතිය. දීප්තිමත් කොට්ටම්බා ඇස්. ඇය තුළ වන මිහිරි කැළඹීම ඔහුට දැනෙයි. හදිසියෙන්ම ඇගෙන් වෙන්ව යන ඔහු රාත්‍රි මුහුදු රළ දෙසට දිව යයි. දියෙහි කිමිදෙන ඔහු දෑතින් වතුර කළඹමින් පිහිනා යයි. සුදෝ සුදු සඳඑළිය යට රිදී පැහැ ජල දහරා ඔහුගේ ඇඟිලි තුඩුවලින් බේරෙන්ට වෙයි.

ඔහු දෙස බලා සිටින ඕ ප්‍රීතිමත්ව දෑසෙහි නැඟෙන කඳුළු පිසදා ගනයති. තමා සමඟම සුවපහසුවෙන් සිටින්නේ කෙසේදැයි ඇය උගන්නේ ඔහු තුළිනි. තමාගේ විනිශ්චය නිවැරදි බැව්ද තමාට තමා ගැන විශ්වාස බැව්ද ඇය ඉගෙන ගනියි. ඇය තවදුරටත් චංචල නැත. ඇගේ සිත දැන් සැහැල්ලුවෙනි. ඇය සතුටින් තෘප්තිමත්ව සහ ප්‍රබෝධමත්ව තබන්ට යූ කුවෙයි සමත් වෙයි. ඔවුහු දැඩි ලෙසම ප්‍රේමයෙහි බැඳී සිටිති. දැන් ඔහුගේ හැම ගැහැනියම ඇයයි. හැම රාත්‍රියකදීම ඕ වෙනස්ය. ඇය රඟපාන්ට කැමැතිය. ඊයේ රාත්‍රියේ ඇය නෝරාය. අද ඇය යූජි ආර්යාව වන්නීය. ඈ රඟපාන්නේ අව්‍යාජවය. නිරුත්සාහීවය. ගැහැනු අතර ඔහු ජනප්‍රියව සිටීම ඇයට සතුටකි. කිකිළියකට මොනරකු ඉක්මවන්ට අසීරු බව ඇය පසක් කරනුයේ එපරිද්දෙනි. ඔහුගේ දෑතෙහි රැඳි කවරම භූමිකාවක් මුත් රඟපාන්ට තමන් සමත් බැව් ඇය පසක් කරයි.

ඇය ඔහු ගැන මෙනෙහි කරන්නේ ඒ යුගයේ වීරයකු ලෙසිනි. තමා බලවන්ත මිනිසෙකු පෝෂණය කරමින් සිටින බවක් ඇයට හැඟී යෙයි. ඔහුගෙ ශක්තියේත් බලයේත් අගයේත් උල්පත තමා වෙතැයි ඇය සිතන්ට වෙයි. හැම රැයකම ඔහු වෙනුවෙන් ඇය විවෘත වන හැම රැයකම ඇයට හැඟෙන්නේ එසේය. තමා කොතරම් නම් ඔහුට ප්‍රාර්ථනීයද ඔහුට තමාගෙන් තොරව ඉන්නට නොහැකි නොවේද යන කාරණා ඇය මෙනෙහි කරන්නේ දැඩි තෘප්තියෙනි. ඒ මිහිරි වදහිංසාව තව තවත් දික් කරනුවට ඇය කැමතිය. ඔහුට තව තවත් තමා අවශ්‍ය වන තැනට කටයුතු සලසන්ට හැකි වීම ගැනද ඇය සිටින්නේ සතුටිනි.

ඇතැම් විට ඇය මුල සිට අග දක්වාම නිහඬය. එවන් අවස්ථාවලදී මුළු කාමරය පුරාම ඇසෙන එකම හඬ නම් ඔවුන්ගේ හුස්ම ගැනීමත් දුර ඈත සයුරේ නැඟ බැස යන රළ පොළොවේ හැපෙන විට නැඟෙන හඬත් පමණි.

යූ කුවෙයි නිර්භය තරමටම ලජ්ජාශීලිද වෙයි. ඔහු ගෞරවයට බඳුන් වුණු මහජන නායකයෙකි. බුද්ධිමත් තැනැත්තෙකි. එසේම තාත්තෙක් වැනි කෙනෙකි. එතෙකුදු වුවත් මා ළඟ සිටින විට නම්, ඔහු පලතුරු කඩයක නිකම්ම කොළුවකු පමණි. ඔහුගේ නින්දේදී ඔහුට මා අවශ්‍ය වන වෙලාවන්හිදී මම එයට කැමැත්තෙමි. නිතරම සිදු වන්නේද එයමය. ඔහු ගෙදර එන්නේ ප්‍රමාද වෙලාය. පළාතේ පක්ෂ ලේකම් හැටියට ඔහුට උසස්වීමක් දී ඇත්තේය. ඔහුගේ රැස්වීම් පැවැත්වෙන්නේ අන්ධකාරයේය. රහසිගතවය. වෙස්වළාගෙනය. හැම රැයකම මම ඔහු එන තුරු බලා සිටිමි.

ඒ 1931 සරත් ඍතුවේ අවසාන භාගයයි. ජපන් ආක්‍රමණය දැඩි වී ඇතැයි මම යූ කුවෙයිගෙන් දැනගනිමි. චීනයේ උතුරුදිග පළාත් තුනම ඔවුන් විසින් අත්පත් කරගෙන ඇත්තේය. කම්කරුවෝත් ශිෂ්‍යයෝත් උද්ඝෝෂණ පවත්වති. දිවා රාත්‍රි දෙක්හිදීම ඒ සම්බන්ධයෙන් මහජන අවධිය ඇති කරනු උදෙසා මගේ ප්‍රේමවන්තයා කටයුතු කරමින් සිටියි. අපි විවාහ වන්ට තීරණය කරමු. විවාහ මංගල උත්සවයකට වේලාවක් ඇත්තේ නැත. අපට කරන්ට වැදගත් කටයුතු ඇත්තේය. කාමර දෙකක ගෙයකට මාරු වී අපි විවාහ ජීවිතයේ පැලපදියම් වෙමු. අපේ එක්වීම ගැන අපගේ මිත්‍රයින්ද නෑදෑයින්ද දැනුවත් කෙරෙයි. සැබැවින්ම යූ කුවෙයිගේ බිරිඳ හැටියට මට සැලකුම් ලැබෙන්ට වූයේ අප දෙදෙනා අතර හාදකම් ඇති වූ මුල් කාලයේදීමය. අප හොඳටම ගැළපෙන යුවළකැයි හැමදෙනාම සිතති.

යූ කුවෙයිගේ නායකත්වය යටතේ කොමියුනිස්ට් කණ්ඩායම වෙනුවෙන් වැඩ කරන්නට මම ස්වේච්ඡාවෙන් ඉදිරිපත් වෙමි. තමාගේ නාට්‍ය සගයින් මගේ හැකියාවන්ගෙන් වැඩ ගනිතැයි ඔහු දන්නේය. මම පුංචි වාමවාදී නාට්‍ය කණ්ඩායමක මුල් පෙළේ නිළියක බවට පත් වෙමි. ජපන් විරෝධී නාට්‍ය නිර්මාණ බිහි කරන්ටත් ඒවා වීදියට ගෙනයන්ටත් මම ඔවුන්ට උදව් කරමි. මුල්ම නාට්‍යය හැඳින්වෙන්නේ උඹලාගේ කසය බිම දාපල්ලා යනුවෙනි.

අන්තිමේදී තමාට දොස් කියන තාත්තෙකුට විරුද්ධව නැගී සිටින තරුණියකගේ චරිතය මම නිරූපණය කරමි. මා රඟපාන්නේ මගේම ජීවිතය නොවේදැයි මට හැඟෙයි. මා රඟදක්වන්නේ මට ගෙදරදී කරන්ට බැරි වූ දේය. මගේ විශ්වාසවන්තම රසිකයා යූ කුවෙයිය. පිරිස අතර ඔහුගේ මුහුණ පෙනෙන විට මට ඇති වන්නේ බලවත් සතුටකි. සෙසු නළු නිළියන්ට ප්‍රශංසා කොට සුබපතන අතරවාරයේදී ඔහු මා වැළඳගෙන සිපගනයි. ඔහු කෑ ගසමින් පිරිසට නායකත්වය දෙයි. ජපන් ආක්‍රමණිකයන් භංග වේවා!

මම මගේ ප්‍රේමවන්තයාගේ කොටසක් වෙමි. ඔහුගේ කටයුතුවල කොටසක් වෙමි. චීනයේ අනාගතයේ කොටසක් වෙමි.

ඔහුගේ සයනයේදී මා හීලෑය. සන්සුන්ය. ඔහු වෙහෙස පත්ව සිටියි. ඔහුගේ හිස කොට්ටයේ හැපෙන සැණින්ම ඔහු නින්දට වැටෙයි. දින ගණනාවක් පුරාම ඔහුට නිදාගන්ට ලැබී නැත. අවදි වන මම ඔහුට නූඩ්ල්ස්ද, එළවළු වෑංජනද පිළියෙළ කරමි. අවදි වුණු විට, ඔහුට කෑම අවශ්‍ය බව මම දනිමි. ඔහු හුඟක් කයි. පිඟන් තුනක්. ඔහු අහර බුදින හැටි දකින මට හිනා යයි. තමාගේ හැසිරීම ගැන මගෙන් සමාව ඉල්ලන ඔහු දිගටම අහර කිසෙහි යෙදෙයි. ටොයිලට් එකක් හැටියට තමා හඳුන්වා ගන්නා ඔහු තමා කරන්නේ බඩ දිගේ කෑම සෝදා හැරීම බැව් පවසයි.

ගෙබිම මත කකුල් හරස් අතට තබාගෙන හිඳගන්නා මම ඔහු නිදා සිටින අයුරු බලා හිඳිමි. කොල්ලෙකුගේ වැනි ඔහුගේ සුන්දර මුහුණ. ඇතැම් විටෙක ඔහු නින්දෙන් නන්දොඩවයි. ඔහු කොතරම් වෙහෙසට පත් වෙලාද යත් ඔහු නිදන්නේ කබායත් හැඳගෙනමය. එය ගලවා ඉවත තබන්ටවත් ඔහුට ශක්තියක් ඉතිරිව නැත. මම ඔහු අවදි නොකරමි. මම ඔහුගේ සපත්තු සෙමෙන් ගලවා සීරුවෙන් ඉවත තබමි. ඔහු අවදි වෙතැයි මට බය හිතෙයි. එහෙත් ඔහු සිහින දකිමින් සුවසේ නිදයි.

ඔහු ළඟින් වැතිරෙන මම නින්දට වැටෙමි. මඳ වේලාවකින් ඇසෙන ශබ්දයෙන් මම අවදි වෙමි. දිග කලකින් ඔහු දැක නැති වගක් මට දැනෙයි. එවෙලේ ඔහු අවදි වෙතැයිද දැන් තමා යා යුතු වනැයි කියතැයිද මට බියකි.

මම ඔහුගේ කබායත්, කමිසයත්, යට ඇඳුමත් ගලවා ඉවත් කරමි. ඇඳේ බිත්තිය පැත්තට ඔහු තල්ලු කරමි. ඔහු ඇහැරෙන්නේ නැත. මේ සියල්ල කරන්නේ මා බැව් ඔහු දන්නවා විය හැක.

සිහින දකිමින් සිටියදී ඇය එසේ කරනවාට තමා කැමති යැයි ඔහු ඇයට පවසා ඇත. නින්දේදී පැහි පැහී එන සිහිනයක් දකින හැම මොහොතකම ඇය තමා ළග සිටින බැව් ඔහු දන්නේය. ඔහු එබැව් ඇයටද පවසා ඇත. සිරුරට අහර දෙන්ට තරම් ඉස්පාසුවක් ඔහුට ඇත්තේ නැත. ඒ සිනිඳු ආශාවන් පුබුදින්නේ නින්දේදීය. ඔහුට ඇය අවශ්‍ය වන ඒ වේලාව හරියටම ඇය දන්නීය.

සුපුරුදු පරිදි එය අරඹන්නේ තුවායකිනි. ඔහු දුහුවිල්ලෙන්ද දහදියෙන්ද වැසී සිටියි. ඇය තුවායෙන් ඔහුගේ සිරුර පිරිමදියි. දෙතුන් වතාවක් එසේ කළ පසුව තුවාය දුඹුරු පැහැ ගනියි. ඇය වටේ කැරකෙමින් තුවාය උණු දියෙහි පොඟවා යළි යළිත් ඔහුගේ සිරුර පිරිමදින්ට වෙයි. ඇතැම් විට ඇගේ කාරිය පහසු කරන්නට මෙන් ඔහු අඩ නින්දේදීම අනෙක් පසට හැරෙයි. උපතින්ම තමා සැප සොයන මිනිහෙකැයි ඔහු ඇයට පවසයි. ඒ මධ්‍යම පන්තියට අයත් ඔහුගේ පවුල් පසුබිම නිසාය. ඒ පවුල් සැප සම්පත් විඳගැනීමෙන් නරක් වූ ඒවාය. එතකොට ඔහු විප්ලවවාදියෙකු බවට පත් වුණේ කොහොමද? කවර හේතුවක් නිසාද? ඒ ගැන ඇයට අදහසක් නැත. එවැනි අය කොමියුනිස්ට් පක්ෂයේ සිටිති. ඔවුන් තමන්ගේ ඔළුගෙඩි පරදුවට තබන්නේ කවර නම් කාරණයක් නිසාද? සත්තකින්ම ආහාර නිසාම නම් නොවෙයි. පාලනය කිරීමේ බලය ලබාගැනීම උදෙසාය. රට ගැන ඇති ආදරය නිසාද? එහෙමත් නැතිනම් කිසියම් සහජ පෙළඹවීමක් නිසාද? ඒ කියන්නේ සෙසු අයවලුන්ට වඩා ලොකු මිනිහකු වන බලාපොරොත්තුවෙන්ද?

ඉතිරි ෙකාටස / සඳුදා පත්තරය සමඟ

පරිවර්තනය | ඩබ්ලියු. ඒ. අබේසිංහ

මාතෘකා