"ඔහේ චීන ජාතිකයෙක්ද? "

 ඡායාරූපය:

"ඔහේ චීන ජාතිකයෙක්ද? "

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

රාජ සභාවේ නිලධාරීන් පිරිසක් කවියා කෙරෙහි සිය අප්‍රසාදය පළ කරන බැව් අධිරාජයාට දැනුම් දී ඇත. ටෑන් නාහ් ඇයට පැහැදිලි කර දෙයි. සූගේ කවිවල අධිරාජයා කෙරෙහි අගෞරවයත් කුපිත කිරීමත් අඩංගු බැව් ඔවුන් විසින් පෙන්වා දෙනු ලැබ ඇත. අධිරාජයා තුළ ඇති කරන ලද සැක සාංකා හේතුවෙන් දිවි ඇති තුරාම සූ කවියා රටෙන් පිටුවහල් කෙරිණි. කවියා සදහටම සිය පවුලෙන් වෙන් විය යුතුය. උපන් නගරයෙන් ඇදගෙන ඔහු දමනු ලැබ ඇත්තේ බටහිර කාන්තාරය දෙසට දිවෙන දුෂ්කර දිගු ගමනකටය. නිකන් හිතා බලන්න. අතොරක් නැති ප්‍රශ්න කිරීම්වලට භාජන වූ හැටි. ප්‍රාදේශීය ගහලයන්ගේ වදහිංසාවලට ඔහු ලක්වුණු හැටි. ආණ්ඩුවට බිය වී ඔහුගේ මිතුරන් සියලු දෙනාම ඔහුගෙන් ඈත් වුණු හැටි ගැන හිතල බලන්ඩ.

හුදකලා කිරීමත්, හදවතේ තනිකමත්, තරම් බරපතළ වේදනාවක් ජීවිතයේ ඇත්තේ නෑ. ටෑන් නාහ් දිගටම කියාගෙන යයි. ඒ වුණත් කවියා තමාගේ ආත්මය සමඟත් ජීවමාන වුණා. ඒ කාලෙදි තමයි කවියා තුළ රතු බිත්තියේ ලියවිල්ල කියන කාව්‍යය පිළිසිඳ ගත්තෙ. ඒ කාව්‍යය බිහි වුණේම බලාපොරොත්තු කඩවීම තුළින්. පණ නහගන්ට. කවියා තුළ ඇති වුණු ආවේගය පුපුරා ගිහින් තමයි ඒ කාව්‍යය බිහි වුණේ. පරිණතභාවය පළ කරමින් කරුණු විස්තර කරන විට යුවතිය ටෑන් නාහ් දෙස බලා සිටින්නේ විස්මයට පත්වය.

ඒ නම්, සූර්යයාගේ රශ්මිය බඳුය. එතෙකුදු දීප්තිමත්ද දෑසට හානිකරද නොවේ. ඒ නම් ප්‍රසන්න වූද, ධ්වනියෙන් යුතු වූද රාවයකි. එතෙකුදු, සීනි තවරන ලද්දේ නොවෙයි. එය සහනයකි. අවධානයක් අපේක්ෂා කරන්නේද නැත. තවදුරටත් සතුටු කරන්නට අවශ්‍යතාවක් නැත්තේය. ඒ තත්ත්වයට පැමිණි විට ඒ මොහොතට එළැඹි විට අවබෝධ කරගන්නැයි අනෙකාගෙන් ඇයදුමක් කළ යුත්තේද නැත. ඒ වනාහි සියල්ලටම සමාව දෙන සිනහවකි. එය කෙනෙකුගේ සාමකාමීභාවයයි. කෙනකු භෞතික ලෝකයෙන් ඈත්ව සිටීමයි. ඒ නම් කිසිවක් සාක්ෂාක් කරගනු සඳහා නඟින්නට ඇති කඳු මුදුනක් නොවේය. අනුරාගීභාවය නමැති ඇනූ පිටි හුමාලයට අල්ලන්ට සූදානම් කරනු ලැබ ඇත්තේය. කඳු සිරසකින් හමා එන සුළඟේ විනිවිද යන හඬ සිහින් කෙඳිරිල්ලකට හැරී විලක ජල තලයට එකතු වන මොහොතය.

එක් සන්ධ්‍යාවක ප්‍රාදේශීය අවන්හලක රාත්‍රී කෑමෙන් පසුව, අපි පාර දිගේ ගමන් කරමින් සිටිමු. හදිසියේම ශබ්දයකි. එක් නිවාස පේළියකට එහායින් වීදියේ උදව්වක් ඉල්ලමින් කවුදෝ කෑගසයි. අප එතැනට සමීප වන විට දකින්ට ලැබුණේ මහත දෙහෙත රුසියන්කාරයකු කෙට්ටු රික්ෂෝකරුවකුට පහර දෙමින් සිටින අයුරුය. රුසියානුවා චෝදනා කරන්නේ රික්ෂෝකරු හුඟක් වැඩි කුලියක් ඉල්ලූ බවය. එතැන පිරිසක් සිටින නමුත් කිසිවකු රික්ෂෝකරු වෙනුවෙන් කතා නොකරයි.

අපි මඳ වේලාවක් බලා සිටිමු. ටෑන් නාහ් අවුලට පත් වෙයි. ඇයි ඔය දෙන්න කතා කරල සාධාරණ ගණනකට එන්නෙ නැත්තේ? ටෑන් නාහ් රුසියන්කාරයා වෙත යයි. රික්ෂෝකරුට පහරදීම නවත්වන මෙන් ඔහු බල කර සිටියි.

මෙතනින් අහකට වෙනව, රුසියන්කාරයා පවසයි.

නෑ, ටෑන් නාහ් පිළිතුරු දෙයි. ගෙවන්නෙත් නෑ. යන්නෙත් නෑ.

රුසියන්කාරයා ආපසු හැරී ටෑන් නහ්ට පහර දෙනු ඇතැයි මම කලබල වෙමි. පැහැදිලිවම ඔහු ඊළඟට කරනු ඇත්තේ එයයි. එහෙත් ටෑන් නාහ් දැඩිව සිටියි. ඒ මොහොතේ දී ඔහු කෙරෙහි මගේ ආදරය දැඩි සේ දැනෙන්ට වෙයි. නියම වීරයෙක්.

රික්ෂෝකාරයාට පැහැදිලිව කතා කරගන්ට බැරිය. ඔහුගේ කටින් ලේ ගලයි. රුසියන්කාරයා ඉංගිරිසි කතා කරයි. ඔහු කියා සිටින්නේ තඹයක්වත් ගෙවන්නේ නැතිව පිටව යන බවයි.

යුවාන් පහක් දුන්නම මොකද ? ටෑන් නාහ් මහ හඬින් කතා කරයි. මේ පළාත ගැන මං හොඳට දන්නවා. රික්ෂෝව පටන්ගත්ත තැන ඉඳල අවසන් වෙච්ච තැන දක්වා කුලිය අඩුම ගණනේ යුවාන් අටක්. අපි සාධාරණයක් කරමු.

ඩිමේ එකක්. රුසියන්කාරයා අපහාසාත්මක ලෙස ඒ මුදල දෙන්ට ඉදිරිපත් වෙයි. ඔහු ඩිමේ කාසියක් බිම දමයි.

එක පාරටම නැඟිටින රික්ෂෝකාරයා රුසියන්කාරයා වෙත කඩා පනියි. පිරිසේද ආධාර ඇතිව ටෑන් නාහ් සහ මම, මිනිසුන් දෙදෙනාම ළඟම පොලිසියට ගෙන යමු.

පොලිස් ස්ථානයේ දී රික්ෂෝකාරයාට සාධාරණය ඉටු වනු ඇතැයි අපි බලාපොරොත්තු වෙමු. නමුත් අපගේ බලාපොරොත්තු ඉටු නොවෙයි. විදේශිකයකුට විරුද්ධ වෙන්ට කවුද තමුසෙට බලය දුන්නෙ? පොලිස් ප්‍රධානියා ටෑන් නාහ් වෙත කඩා පනියි. එයා ආයෝජකයෙක් වෙන්ඩ පුළුවනි. එයාට අපේ රට තුළ කරදරයක් නොවෙන්ඩ අපි වගබලාගන්ඩ ඕනෑ.

ඔහේ චීන ජාතිකයෙක්ද ? ටෑන් නාහ් බෙරිහන් දෙයි. ඔහේගෙ වගකීම තමයි තවත් චීන ජාතිකයකුට හිංසා කරල තියෙද්දි ඒ මිනිහට උදවු කරන එක. පොලිස් ප්‍රධානියා රුසියන්කාරයා නිදහස් කොට රික්ෂෝකාරයාට දඩ ගසයි. ටෑන් නාහ්ගේ මුළු සිරුරම කෝපයෙන් වෙවුලන්ට වෙයි.

බොහෝ වේලාවක් ගත වනතුරු, ටෑන් නාහ්ට කතා කරන්ට බැරිය.

අපි දිගටම අපේ සක්මනෙහි යෙදෙමු. නමුත් අපේ මනෝභාවය සම්පූර්ණයෙන්ම වෙනස් වෙලාය.

ගාර්ඩිනියා සුවඳ තවදුරටත් මිහිරි නැත. රාත්‍රී දර්ශනයද සිතට සුව එළවන්නේ නොවෙයි.

විප්ලවයක් තමයි සිද්ධ වෙන්ට ඕනෑ. අන්තිමේ දී ටෑන් නාහ් කොඳුරයි. චියන්කායි ෂෙක්ගෙ ආණ්ඩුව සම්පූර්ණයෙන්ම දූෂිතයි. එය බිඳ වැට්ටුවෙ නැත්නම් චීනයට අනාගත බලාපොරොත්තුවක් ඇත්තෙ නෑ. මම මේ සිද්ධිය නාට්‍යයක ලියනවා. ඔයා ඒකෙ රඟපාන්ට ඕනෑ.

හදිසියේම අපි ගමන නවතමු. අපි දෙදෙන වීදිය මැද එකිනෙකා වැලඳගෙන අනුරාගයෙන් මත්ව සිපගනිමු. දෙගොඩහරි ජාමයේ වේදනාවකුත් මැද.

මා සිතන්නේ මා සූදානම්ය කියාය. යූකුවෙයිත් අනිත් අයත් සමඟ ඇති සම්බන්ධය අවසන්ය. මා පූර්ණ වශයෙන් ආදර ගෞරව කරන මිනිහා සමඟ, මම අලුත් සම්බන්ධයක් ආරම්භ කරමි. ඒ වුණත් මට බිය දැනෙයි. මට ඉදිරියට යන්ට බැරිය. ඒ සිහින් හඬ කලබලකාරී ස්වරයෙන් මගේ හිස කොනක සිට මා රිදවනු දැනෙයි. ඉන් කියවෙන්නේ මටම රිදවා ගැනීමට මා සූදානමින් සිටින බවකි.

මම ටෑන් නාහ්ගේ දෑතෙහි වෙලී සිටිමි. මා තදින් තව තවත් තදින් වැලඳ ගන්නැයි මම ඔහුට කියමි. මට කරුණු තේරුම් කරන්නැයි මම ඔහුගෙන් ඉල්ලා සිටිමි. ඔයා මොකක් ගැනද බය වෙලා තියෙන්නෙ? ඔහුගේ දෑසෙහි කඳුළුය. මා වේදනාවෙන් සිටිනු ඔහුට දරාගන්ට බැරිය. ආයෙත් කවදාවත්ම ඔයාට රිදවන්නෙ නෑ. මං පොරොන්දු වෙනවා.

මං විප්ලවවාදිනියක්. ඒ අමුතු යෙදුම මගේ මුවින් ගිලිහෙයි. මගේ හඬෙහි මුවාතක් නැත. හරියට පරීක්ෂාකාරී ප්‍රකාශයක් මෙනි. ටෑන් නාහ් පිළිතුරක් නොදෙයි. ඔහු අවුලට පත් වෙලාය.

ඔව් මාත්. ඒක අමුතුයි. මට පැහැදිලි කිරීමක් කරන්ට බැරිය. හේතුවක් තියෙන්ට ඕනෑය. මේ වන විටද පීඩනයක් ගොඩනැ‍ඟී තිබිය යුතුය. අප දෙදෙනා එකට එකතු කරනවා වගේම වෙන් කරන ආකාරයේ පීඩනයක්. මා කතා කරන්නේ පෙලඹවීමකින් නොවේ. මට හිතෙන්නේ ඒ මේක තමයි කියාය. මගේ විඥානය මට කියන්නේ නොගැළපෙන එකමුතුවක් සිදුව ඇති බවය. අප දෙදෙනා අතර පුරවන්නට අසීරු හිදැසක්. එය සිදු වන්නේ හරියටම ඒ වෙලාවේය. නව්‍යභාවය මැදදීමය. නමුත් ඉන් පලක් ඇත්තේ නැත. කිසිවකුට ඉරණමෙන් බේරෙන්ට බැරිය. එකම මඟ යන්ට නම් අප දෙදෙනාම එකට එකතු විය යුුතුය. ගින්කෝ ඇට විකුණමින් සිටි කොලුවාගේත් ඔහු අතේ තිබුණු ආලෝකයේත් මතය බෙදාගන්ට නම්.

රුසියන්කාරයා පිළිබඳ සිද්ධියට දින කිහිපයකට පසුව අපි ෂැන්හයිවල උතුරු පැත්තේ ඇති කුඩා වාසස්ථානයක් කුලියට ගන්ට බදු ගිවිසුමක් අත්සන් කරමු. අපි එතැන පදිංචියට ගොස් එකට ජීවත් වන්ට පටන් ගනිමු.

මාතෘකා