ඔහුගේ මුළු විශ්වයම ඇය වන්නීය

 ඡායාරූපය:

ඔහුගේ මුළු විශ්වයම ඇය වන්නීය

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

මට ටෑන් නාහ් මුණගැසුණේ ඉරණම්කාර සන්ධ්‍යාවකය. අප දෙදෙනාටම සේවය කරන්ට නියමිත වූ මාර්ගය විවෘත වුණේ එදාය.

මම ෂැන්හයි චිත්‍රාගාරය වෙත යමින් සිටියෙමි. මෙම ස්ටුඩියෝව මාත් සමඟ ගිවිසුමකට එළැඹ වැඩි කලක් ගතව නැත. එය ඔවුන් සම්බන්ධයෙන් නම් හුදු අහම්බයක් විය හැක. එය සුළු ගිවිසුමකි. එහෙත් ව්‍යාපාරික පැත්තෙන් බලන විට මට වාසිදායකය. කෙසේ වෙතත් චිත්‍රාගාරයේ පියාපතක් යටතට එන්ට හැකි වීම මගේ පැත්තෙන් යහපතකි. මට ලැබෙන සුළු චරිත මවිසින්ම සොයා ගත යුතු ඒවාය. මට නිදාගැනිල්ලක් ඇත්තේ නැත. මේ ව්‍යාපාරයේ දී නිළියන් සිටින්නේ විකිණෙන්නටය. අලුත් තරුණියක් මතු වුණාම ඇය ගැන ”බලාකියා ගන්ට” මේ නගරයේ ඇතැම් මිනිස්සු ඉදිරිපත් වෙති. එය ෂැන්හයි නගර සම්ප්‍රදායකි. මේ මිනිස්සු බලවන්තයෝය. ව්‍යාපාරයට මුදල් යොදවන අයවළුන්ය. තේ හෝ කෝපි පානය කරන්ට ඔවුහු මා කැඳවති. සත්තකින්ම ඔබට නිලවරමක් ඇත්තේය. හැකියාවක්ද ඇත්තේය. ඔවුහු පවසති. ඔවුන්ගේ හුස්ම ගඳ ගසයි. ඇයි ඔයා මගෙ ගෙදරට එන්නෙ නැත්තෙ? ආවොත් මට පුළුවනි, ඔයාව අහවලාට හඳුන්වා දෙන්ට.....

ඇය බලවන්ත මිනිසුන් සමඟ තේද, කෝපිද පානය කරන්නීය. ඔවුන් උදෙසා කිසියම් වෙස්ගැන්වීමක්ද ඇය කරයි. අන්තිම මිනිත්තුවේ දී එළියට බසින්ට ඇය කෙසේ හෝ කටයුතු සලසා ගනියි. එසේ නොකළ බොහෝ යුවතියන් ගැන ඇය දන්නේය. ඔවුන් ඇතුළේ සිටිය දී දොර වැසෙයි. ඉනික්බිතිව ඔවුන්ගේ ආත්මය සඳහටම නැති බංග වෙයි. ඩෝල්ස් හවුස් කීර්තිය මතින් පෙරට යා හැකි බැව් ලෑන් පින්ගේ විශ්වාසයයි. එහෙත් ඇගේ සිනහව යටිපත්ලේ ඇත්තේ තනිකමය. දොම්නසය. නිතරෝම ඇගේ මිහිරි කටහඬ තැනට ගැළපෙන්නේ නොවෙයි. එහි නෙත්තියේ ඇත්තේ බියකි. පොළොව පළාගෙන යනුද, අන්තිමේ දී හෙමින් හෙමින් එය තමා ගිලගනුද රාත්‍රියේ දී ඇයට සිහිනෙන් පෙනෙයි.

ඇය ටෑන් නාහ් මුණගැසෙන්නේ එවන් භීතියකිනි. ඔහු ගොම්මන් වෙලාවක ෙඝා්ෂාකාරී වීදියක දී ඇය වෙත පැමිණෙමින් සිටියි. ඔහු සිනාසෙයි. නවතියි. තොලග ඇති සිගරැට්ටුව අතට ගෙන තමා හඳුන්වා දෙයි.

යාන්තම් ඉර බැස්සා පමණි. අහස රතු වලාකුළුවලින් බර වී ඇත. මා සිටින්නේ හෙම්බත් වුණු මනෝභාවයකය. නමුත් මා ඉදිරිපස සිටින මිනිහා කවුරුත් දන්නා බොහොම ප්‍රසිද්ධ පුවත්පත් කලාවේදියෙකි. ඩාගොන්බාවෝ නමැති ප්‍රධාන පුවත්පත් කර්තෘ මාණ්ඩලිකයෙකි. ඔහුට අවිනීත වන්ට මට බැරිය. මම ඔහු වෙත අත දිගු කරමි.

කනගාටුයි, මට හරියට නිච්චියක් නෑ.... අපි කොහෙදි හරි හම්බ වුණාවත්ද?

ඇයි, ඩෑන් අඳුන්නල දුන්නෙ? මතක නැද්ද?

ඕ, ඇත්ත තමයි. දැන් මට මතකයි, මිස්ට ටෑන් නාහ්. මම ඔබේ විචාර කියවල තියෙනව. ඒවා හරිම ඉහළයි.

ඔහු හිස සලයි. නෝරා බලන්ට නැති වීම ගැන දුකයි.

බොහොම ස්තුතියි. කිසියම් හේතුවක් නිසා මගේ නැහැය කිති කැවෙයි. මම සැණෙකින් පදික වේදිකාව දෙස බිම බලාගෙන මෙසේ කියමි. ඔබ ඒ ගැන කතා කිරීම අහන්ඩත් සතුටක්.

නෑ, මම ඔබට ප්‍රශංසාවක් කරනවාම නෙමෙයි. මට කියන්ඩ ඕනෑ කළේ ඔබ ඉතා දක්ෂ නිළියක් බව.

තමා අඩුම ගානේ අට වතාවක්වත් නාට්‍යය නරඹා ඇති බැව්, ඔහු මට පවසයි. වේදිකාව මත මගේ ඉරියව් අනුකරණය කොට දක්වන හේ වටයක් කැරකී ඇවිත් මා යන හැටියට පියවර තබයි. නාට්‍යය තුළ මාගේ මුල්ම ප්‍රවේශයද එයයි.

ඔහු, වැටී ඇති මගේ මනෝභාවය ඔසොවා තබයි. මට හිනා නොවී ඉන්ට බැරිය. ඒ තරමටම හාස්‍යජනකය.

වරක් ඔයාගෙ සැටින් ඇඳුම පැටළුණා නේද ඔහු කියන්ට වෙයි. ඔහුගේ දෑත ක්‍රියාශීලීය. මතකද? නෑ? මට ඔයා ගැන බයක් හිතුණා. නමුත් ඒ ඇබැද්දිය ඔයා නාට්‍යයේම කොටසක් බවට හරවගත්තා. මා තුළ හටගත්තෙ බලවත් පැහැදීමක්. මගේ ජීවිතේ මම කොතෙකුත් නාට්‍ය දර්ශන බලල තියෙනව. නමුත් ඔයා වාගෙ කෙනෙක් නම් දැකළ නෑ.

මම ඔහුට සවන්දීගෙනම සිටිමි. ඇත්තටම මටත් නෝරා ගැන දුකයි. මම ඔහුට පිළිතුරු දෙමි.

මම ඔබ මුණගැහෙන්ඩ බලාගෙන හිටියෙ බොහොම කාලෙක ඉඳල ඔහු කියාගෙන යයි. නාට්‍ය දර්ශනය අවසන් වුණාට පස්සෙ මං කීප වතාවක්ම වේදිකාව පිටිපස්සටත් ගියා ඔයාව දැකගන්ඩ ලැබෙයිදෝ කියල බලන්ඩ.

ඊට අවුරුදු ගණනාවකට පසුව මාවෝ මැතිනියට සිය සිහිනවල දී විශේෂ මොහොතක් දර්ශනය වී පෙනෙන්ට වෙයි. පෙම්වතුන් දෙදෙන කෑම කඩ පේළියක් ඇති කුඩා වීදියක සිටගෙනය. ටෝෆු සුප්, පැණි රස සහ ඇඹුල් රස ගෝවා, දිය චෙස්නට්, හාල් නූඩ්ල්ස් සමඟ තාරා ලේ සුප්. වීදියේ කොනක බැදපු ගින්කෝ ඇට විකුණමින් සිටි කොලුවකු පිළිබඳ පැහැදිලි මතකයක් ඇයට ඇත. ඔහු තාච්චියක ඇට බදිමින් සිටියේ උසුලාගෙන යා හැකි පුංචි උදුනක් මත තබාගෙනය. හරියට, කොලුවා අතේ එළියක් පත්තු කරගෙන යනවා වගේය.

ඔවුන් පටන්ගන්නේ මෙහෙමය. මුලින් නිකන්ම ඇවිදින්ට යාමකි. කිසියම් තැනකින් ඇය අරගෙන ඇය කිසිවිටෙක දැක නැති ස්ථාන නරඹන්ට ඇයට සැලැස්වීමය. ඇඟිලි අතර සිගරැට්ටුවක් රුවාගෙන කතා කරන අතර ඔහු සිය දැනුම ගෙනහැර පායි. එක පැත්තකින් ඔහු සෞම්‍යය; නිහතමානීය. අනිත් පැත්තෙන් මානාධිකය. දැඩි මතධාරීය. ඔහු විචාරකයකු හැටියට සිය නම රඳවාගන්නේ ඒ අයුරිනි.

ඔවුහු එකිනෙකාට වෙනස්ය. චරිතයෙන් නම් එකිනෙකාගේ විරුද්ධ පැත්තය. ටෑන් නාහ් ප්‍රබුද්ධකාරකයකු බැව් ඇය වටහාගනියි. ඇය ඔහුගේ ඉංගිරිසි බසට වශී වෙයි. ඔහු අයත් වන්නේ අලුත් ලෝකයකටය. එතුළට පිවිසෙන්ට ඇයටද ඉහිලූම් නැතිය. ඔහුගේ ලිබරල් ආකල්පවලට ඇය වශී වෙලාය. ඔහු යූ කුවෙයිට හාත්පසින්ම වෙනස් මිනිහෙකි. යූ කුවෙයි විසින් ඇය තුළ ඇති කරන ලද්දේ අනතුරට මුහුණ දීමේ නිර්භීතකම නම් ටෑන් නාහ් ඇය තුළ ඇති කරන්නේ ශිෂ්ටත්වයයි. සංස්කෘතියයි. යූ කුවෙයි විසින් ඇගේ චරිතය විවෘත කොට හැඩගසන ලද්දේ වී නම් ටෑන් නාහ් කරන්නේ ඇය වැලඳගෙන ඇගේ භූමිකාව තුළ තමා දියකර හැරීමය. යූ කුවෙයි යනු නිහඬ අධිෂ්ඨානශීලී මිනිහෙක් නම් ටෑන් නාහ් යනු සංවේදීභාවයෙන් යුතු පූර්ණ අනාරාගයෙන් කටයුතු කරන මිනිහෙකි. යූ කුවෙයිට නම් ඇය තමාගේ විශ්වයේ තාරකාවකි. ටෑන් නාහ්ට, මුළු විශ්වයම ඇය වන්නීය.

මාතෘකා