ඇයයි ඔහුගේ චැටර්ලි ආර්යාව

 ඡායාරූපය:

ඇයයි ඔහුගේ චැටර්ලි ආර්යාව

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

ඔවුන් දෙදෙන වේදිකාව මත පෙම්වතුන්ය. ඇය ඔහුගේ උකුල මත හිඳගනියි. ඇය ඔහුගෙන් ලැබෙන ආදරයට ප්‍රතිචාර දක්වයි. ඔහු පිළිබඳ තමා තුළ ඇති හැඟීම් සියල්ල සඟවා ගැනීමට ඇය හැකි හැම ප්‍රයත්නයක්ම දරන්නී වෙයි. ඊළඟට නියමිතව ඇති කටයුත්තට දිව යන බවක් අඟවමිනි ඇය කඩිමුඩියේම රඟහලෙන් පිටව යන්නේ. ඇය වෑයම් කරන්නේ තමාගේ හුදකලාභාවයෙන් පැන දුවන්නටය. ඩෑන් දෙස හෙළන මඳ බැල්මෙන් පවා ඇයගේ හදවත රිදුම් දෙයි. නාට්‍යයේ මුල් දර්ශනයේ සිට හැම සැඳෑවකම ඩෑන් බලන්ට ලූසීයේ පැමිණ ඇත. දර්ශන මාරුවේ දී ඔවුන් දෙදෙනා හොරෙන් හොරෙන් සිපගනිති. ඩෑන් ඇඳුම් අඳින කාමරය හැමවිටම වසා ඇත්තේය.

තමා පාලනය කරගන්ට - ඩෑන් පිළිබඳ සිතිවිලි අකා මකා දමන්ට - ඇය වෑයම් කරයි. ඇය ඩෑන්ටත් ලූසීටත් තේ පානයට ආරාධනා කරයි. ඒ ඔවුන්ගේ රංගනය වර්ධනය කරන හැටි සාකච්ඡා කරන්ටය! ඇත්ත වශයෙන්ම ඇය එසේ කරන්නේ යථාර්ථයට මුහුණ දෙන හැටි තමාටම උගන්වන්ටය. හරියට අවමඟුලකට මුහුණ දෙනවා වගේය. තමාම හපා කන්න. ඇය දෙදෙනාට මැදිව හිඳගෙන බරපතළ ලෙස හිතට ගෙන කතා කරයි. එකිනෙකාගේ භූමිකාවන් ගැන අවධානය යොමු කරන ඇය ඒ සම්බන්ධයෙන් සිය අදහස්ද දක්වන්නීය. මතයද පවසන්නීය. තේ එක තොල ගාන්ට නැමෙන විට දෑසෙහි කඳුළු උනා ඇති බැව් ඇයට දැනෙන්ට වෙයි.

මගේ හුස්ම හිර කරන මේ ගෙදරින් මම පළා යනව. ගිහිල්ලා මම කොහොම හරි ජීවත් වෙනව. ටෝවල්ඩ්, ඔයාට තේරෙනවද? ඕ, වේදිකාව මත දී හඬනඟා කියන්නීය.

සිය ඉරණම ඇයට උත්තර දෙන්නේ මේ මොහොතේදීය. ටෑන් නාහ් නමැති මිනිහෙක් ඇගේ දර්ශන තලයෙහි මතු වන්නේ ඒ මොහොතේදීය. දෙදෙනා අතර හමුවකට ඔහු මඟ පාදයි. මුල දී නම් විශේෂ එකක් නොවේය. ඔහු ඈ වෙත තල්ලු වන්නේ ඩාර්ක් රූම් එකක ෆොටෝ ප්‍රින්ට් එකක් වගේය. එක තත්පරයක දී එහි රුව පැහැපත් වෙයි. දැන් එය ඉතා පැහැදිලිය.

ආරම්භක රාත්‍රී දර්ශනයට පැමිණි විචාරකයින් අතර ඔහුද සිටියි. සුදු බටහිර ඇඳුම් කට්ටලයකින් සැරසී සුදු සපත්තුද පය ලාගෙන, ඇඳුමට ඔබින තොප්පියක්ද හිසලාගෙන මේ ජේත්තුකාර මිනිහා පැමිණෙන්නේ තමාගේ් ඉරණම සොයාගෙනය. ඒ ඉරණම්කාරිය වෙනුවෙනි, නුදුරු අනාගතයේදීම ඔහු දෙවරක්ම පණ නහගන්ටද තැත් කරන්නේ.

ටෑන් නාහ් ලිබරල් වාදියෙකි. නියම ෂැන්හයි පන්නයේ මධ්‍යම පාන්තිකයෙකි. සාමාන්‍ය තරමට වඩා මඳක් උස ජේත්තුකාර මිනිහෙකි. තමාගේ දිග ඍජු නාසය මත තනි කම්බියේ උපැස් යුවළක් පලඳින ඔහුට ඇත්තේ අනුරාගී මුඛයකි. හොඳ අධ්‍යාපනයක් ලබා ඇති හෙතෙම, බටහිර සාහිත්‍යය පිළිබඳ ප්‍රවීණයෙකි. චැටර්ලි ආර්යාවගේ පෙම්වතා (Lady Chatterley's Lover) ඔහුගේ ප්‍රියතම නවකතා අතර වෙයි. ඔහු සාදවල දී තේ පානය කරමින් සුන්දර කතුන් ඉදිරියේ ඉංගිරිසියෙන් කතා කරයි. ඔහු මුල් දින දර්ශනයට පැමිණෙන්නේ මනාව රැවුල කපා පිටුපසට වන සේ සිනිදුවට කොණ්ඩය පීරාගෙනය. ඔහු හොඳම හොඳ මනෝභාවයෙන් සිටින්නේ වෙයි. රඟහලට පිවිසෙන ඔහු සිය අසුන වෙත පිය නඟන්නේ හැඟීම්වලියක පැටලීගෙනය. පසු කලෙක දී ඔහු විවේචනයට ලක් වන්නේ සිහින ලෝකයක ජීවත් වන යථාර්ථවාදී නොවන මිනිහකු හැටියටය. සිය හැඟීම්වල වසඟයට පත් දුර්වල මිනිහකු හැටියටය. මායාවක් සේ ඇය දර්ශනය වන්නට සිටි, කළුවර අවකාශයට පිවිසෙන මොහොතේදීත්, ඔහු සිටින්නේ එකී මනෝභාවය තුළය.

ඒ මුල්ම රාත්‍රියේ දී මුල්ම දර්ශනයේ දී එතැන කිසිවක් යථාරූපී නොවෙයි. ඇගේ වෙස්ගැන්ම, ඇගේ කේශ කලාපය, ඇගේ ඇඳුම, මේ පුංචි නාටක හල. ඒ සියල්ල, මනඃකල්පිතයකි. ඇයයි ඔහුගේ චැටර්ලි ආර්යාව.

හැම රාත්‍රියකදීම ඇය සිහින මවන්නේ නාට්‍යයේ ස්වකීය භූමිකාව විසින් තමා ඉහළට - ඉහළට - ඔසොවා තබනු ඇත කියාය.

ලෑන් පින් - නෝරා - ඩෑන්ගේ පපුවට හේත්තු වී සිටින්නීය. තමා ප්‍රතික්ෂේප කිරීමේ වරදට ඊට අවුරුදු විසිපහකට පසුව ඇය විසින් දඟගෙට යවනු ලබන්නේද ඒ ඩෑන්ය. දැන් දැන් ඇයට ඔහුගේ හදගැස්ම දැනෙයි. ඔහුගේ සිරුරේ උණුසුම දැනෙයි. තමා තුළම නැ‍ඟෙන අනුරාගයෙන් මත්ව ඇය සිටින්නී ෙප්‍ර්මයෙන් මන රංජිතවය. පාත්‍රයෝ ඔවුන්ගේ පද පේළි කියවති. ඇය ඔහුගෙන් මිදී පැන දුවයි. ඔහු ඇය තමා වෙතට ඇදගනියි. පොර බදන ඇය ඔහු තල්ලු කරයි. ඒ තමා මෙල්ල කරන්ට ඔහුට අවස්ථාවක් දෙනු රිසියෙනි. ඔහු ආපසු පැමිණෙයි. පිටිපසින් සිට ඇගේ දෑත අල්ලාගෙන ඇයට ගෙබිම දෙසට නැවෙන්ට සලස්වයි. අන්තිම ඉරියව්වට ඔවුන් දෙදෙන පැමිණ සිටිති. ඇගේ කෙස්වැටිය පස්සට කඩා වැටෙයි. ඇගේ ළැම ඩෑන්ගේ පපුවට තෙරපෙයි. ඔහුගේ දහදිය දිය වී වෙස්ගැන්වීම සේදී යනු ඇය දකියි. ඔහුගේ හුස්මථ ඇගේ දෙතොලට දැනෙයි.

බෝනික්කි ගෙදර - ඩෝල්ස් හවුස් - ෂැන්හයිහි කතාබහ බවට පත් වෙයි. 1935 දී කතාබහට මාතෘකාව එයයි. ස්වකීය කීර්තිය නමැති රළ මත නැඟී ඉහළට යන ලෑන් පින් දැන් ඇදී යන්නේ චිත්‍රපට කර්මාන්තය දෙසටය. එහෙත් තමාට තවමත් පිළිගැනීමක් නැති බැව් ඇය පසක් කරයි. එතන තවත් කවයකි. තවත් රැලකි. තවත් ගැන්සියකි. එතුළට කඩා වැදෙන්ට නම් පළමු වැනි ඉලක්කමේ සිටම ආරම්භ කළ යුතු බැව් ඇය පසක් කරන්නීය. ඇය දිවා කාලයේ දී චිත්‍රපටවල රඟපාන අවස්ථා කාලය මිඩංගු කරයි. රාත්‍රී කාලයේ දී නෝරාගේ චරිතය කරගෙන යයි. ෙප්‍ර්ක්ෂක පිරිස වැඩි වෙමින් පවතියි. මේ නාට්‍යයේ දේශපාලන බලපෑම ආණ්ඩුවට තර්ජනයකැයි බලවත්තු සිතන්ට පටන් ගනිති. මසකට පමණ පසුව පුවත් පාලන දෙපාර්තමේන්තුව නාට්‍යයේ ඇති දේශපාලන මාත්තුව ඉවත් කරන ලෙස ශාන් මින්ට නියෝග කරයි. ඔහු එයට විරෝධය පාන්නට තම කණ්ඩායම මෙහෙයවන විට ආණ්ඩුව කරන්නේ නාට්‍යය මුළුමනින්ම නවත්වා දැමීමය.

ආණ්ඩුවේ එකී ක්‍රියාකලාපය විවේචනය කරමින් නාට්‍ය කණ්ඩායම විසින් ප්‍රසිද්ධ ලිපියක් නිකුත් කරනු ලබයි. උඩින්ම ඇත්තේ ලෑන් පින්ගේ අත්සනය. වේදිකාව මත පළ කෙරෙන ඒ අනුරාගයෙන්ම, ඒ හඬින්ම, ඒ ස්වරයෙන්ම ඇය ගුවන්විදුලියේදීත්, මහජන රැලිවලදීත් කතා කරන්ට වෙයි. වේගවත් ස්වරයෙන් කතා කරමින් ඇය ආණ්ඩුව හඳුන්වන්නේ ”ටෝවල්ඩ්” හැටියටය.

මාතෘකා