නිදි නේන බිහිසුන් රාත්‍රීන්

 ඡායාරූපය:

නිදි නේන බිහිසුන් රාත්‍රීන්

අන්චී මින් විසින් චීන සංස්කෘතික විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘතික විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිත ලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

ඇය පක්ෂයේ සහෝදරවරුන්ට පවසන්නේ තමා සිරභාරයෙන් නිදහස් වීම හුදෙක්ම වාසනාවට සිදු වූ දෙයක් බවය. තමා කටයුතු කර ඇත්තේ සාක්ෂි මාත්‍රයක්වත් ඉතිරි නොවන ආකාරයටය. තමා මුල සිට අග දක්වාම සලකණු ලැබ ඇත්තේ සැකකාරියක වශයෙන් පමණි. ඒ ඇය ඔවුන්ට කියන කතාවය. තමාගේ නිදහස් වීම වාසනාවට සිදු වූවකැයි කියන්ට ඇයට හැකියාව ලැබෙනුයේ ඒ නිසාවෙනි. එහෙම වෙන්නේ මගේ බලවත් අධිෂ්ඨාන ශක්තිය නිසයි. මට වද දෙද්දි පාපෝච්චාරණය කරන්ට තිබුණා. නමුත් මා ජයග්‍රහණය කළේ කොමියුනිස්ට්වාදය කෙරෙහි මගේ තිබුණු දැඩි කැපවීම නිසයි.

ඇත්ත වශයෙන්ම නම් ඇය පක්ෂ දිවුරුම පාවා දී ඇත්තේය. එබැව් ඇය හොඳාකාර දනියි. ඇය ඒ කාරණය සාධාරණීකරණය කරන්නේ මෙසේය. තමා කොමියුනිස්ට්වාදයට වඩාත් වටින්නේ ඒ වෙනුවෙන් දිවි පිදූවක හැටියට නොව ඒ උදෙසා ජීවත් වන කෙනෙකු හැටියටය.

තම කාමරයට ආපසු පැමිණීමෙන් ඉක්බිතිව මුල් දින කිහිපය තුළම ඇයට නින්දක් නොවීය. ඇය මුළු රැයම ගත කෙළේ නින්දෙන් උඩ වීසිවෙමිනි. සිර මැදිරිය තුළ තමා සමඟ එකට සිටි සිරකාරියන්ගේ ඇඟට කඩා පනින කඩා පැන හපා කන බල්ලන් රොත්තක්ම ඇය සිහිනෙන් දකින්නීය. වධකාගාරය තුළින් නැඟී එන බෙරිහන් දෙන හඬින් ඇය තිගැස්සෙයි. අඩ නින්දෙන් අවදි වූ පසුත් ඇයගේ සිත පිරී යන්නේ වධකාගාරයේ දසුන්වලිනි. මධ්‍යම රාත්‍රිය එළඹීමත් සමඟම අවදි වන ඇය තමා සතු පොත්පත් හා සඟරා සියල්ල එකතු කරගන්නීය. කාමරයෙන් පහළට බසින ඇය ඒ සියල්ල කුණු ගොඩට වීසි කරයි. දිවා කාලය තුළදී කොමියුනිස්ට් පත්‍රිකා අලවා ඇති වීදි මඟ හැර යන්ට ඇය වගබලා ගනියි. ඇය තවදුරටත් කොමියුනිස්ට්වාදී මිතුරන් සමඟ භජනයක් පවත්වන්නේ නැත. තමා නැවතී සිටින කාමරය අයිති ගෙදර ඇති සද්ද බද්දවලට දැන් ඇය වඩාත් කැමැත්තීය. අල්ලපු ගෙදර සැමියාත් බිරිඳත් සණ්ඩු සරුවල් කරගැනීම දැන් නම් ඇයට මිහිරි නාදයකි. නින්දේදී දකින නපුරු සිහිනවලට ඒ ශබ්දය වුණත් කදිම සහනයකි. අල්ලපු ගෙදර කොලුවාගේ පියානෝ වාදනය දෙව්ලොවින් පැමිණි සංගීතයකි. මුළුතැන්ගෙයින් නිකුත් වන බැෙදන සෝයා සුවඳ වුණත් දැන් ඇයට ඉවසා දරා සිටිය හැක. මුළු දිවා කාලය පුරාම ඇඳ මත වැතිර සිටින ඇයට මතක් වෙන්නේම, යූ කුවෙයිය.

මම මගේ නම වෙනස් කරන්ට තීරණයක් ගනිමි. අලුත් නමකින් සංකේතවත් වන්නේ අලුත් ජීවිතයකි. මගේ අලුත් නම මගේ චරිතයද හැඩවෙන නමක් විය යුතුය. කෙනෙකුගේ නමක් වෙනස් කිරීම යනු ෂැංහයිවලටම ආවේණික වූ සම්මතයකි. එහි ජේත්තුකාර ජීවිතයේ අංගයකි. එමඟින් කෙනෙකු අවධානයට ලක් වෙයි. සමහරු තමන්ගේ නමේ අග කොටසේ ඇති සාම්ප්‍රදායික අක්ෂර තුන අක්ෂර දෙකකට කෙටි කරති. එය සලකනු ලබන්නේ විප්ලවකාරී ක්‍රියාවක් හැටියටය. ඒ අලුත් නම්වලින් නැඟන හඬ ඉතා අපූරුය. මා ප්‍රබෝධයට පත් කළ නම්ද ඒ අතර වෙයි. විශේෂයෙන්ම පිළිගත් ලේඛකයන්ගේ සහ නිළියන්ගේ නම් බෙහෙවින්ම මන බඳියි. ඒ කියන්නේ බින්ග් සින් - හිම සීතල හදවත. සියාඕ යුඒ - හිනාවෙන හඳ. හූ ඩී - සමනළයා.

මම මට නමක් තබාගනිමි. මින් පසු මා, ලෑන් පින්ය. ලෑන් කියන්නේ මගේ ප්‍රියතම වර්ණය වන නිලය. පින් යන වචනයේ තේරුම ඇපල් සහ පැණි රසය. නිල් පැහැය ඇසුරු කරන්නේ අහසය; තීන්තය; මිථ්‍යා ප්‍රබන්ධයය. එසේම, ඇපල් යනු, අස්වැන්නය; ඉදුණු බවය; පලබර අනාගතයය. ඒ අතර මා උපන් නගරය වන ෂෑන් ඩොන් නුවර වෙළඳ ලකුණත් අපනයන භාණ්ඩයත් ඇපල්ය.

බන්ධනාගාරයෙන් නිදහස්ව පුනර්ජීවනය ලැබීමෙන් පසුව මම අතු ඉතිලා වැඩෙන්ට වූයෙමි. රඟපෑමේ අවස්ථාව ලබාගැනීම උදෙසා මම මගේ පැරණි මිතුරන් සමඟ යළිත් සම්බන්ධ වෙමි. මා රට වෙනුවෙන් කැප වී වැඩ කරන්ට සූදානම් බැව් ජනතාවට පවසමි. හොඳ නාට්‍යයකින් සිදු වන්නේ ජාතියක් සතු හෘදය සාක්ෂියකට පෙලඹවීමක් ලබා දීමය. වැදගත්ම කාරණය එය බැව් මම ජනතාවට කියමි.

මම මගේ අධිෂ්ඨාන ශක්තිය පරීක්ෂණයට භාජනය කරමි. මම මගේ හොඳම සිනාවෙන් සැරසීගනිමි. මගේ නිල් පැහැ ඇඳුම පරිස්සම් කරගත යුතු හෙයින් පරණ හැට්ටයක් ඇඳගනිමි. එවිට මිනිසුන් පිරී ඇති බස්වල තෙරපි තෙරපී ගමන් කිරීම පහසුය. යන යන තැන්වල නිල් ඇඳුම රැගෙන යමි. මගේ විවිධාකාර හමුවීම්වලට පෙර ඒ නිල් ඇඳුම ඇඳගනිමි. හමුවීම්, රැස්වීම්, අවසන් වූ පසුව යළිත් පරණ හැට්ටය ඇඳගනිමි. රැස්වීම මැදදී මගේ හිස් බඩ කෑගසයි. එවිට මම හුඟක් වතුර බොමි. ඇරත් මගේ දෙපා වසාගත යුතුය. මන්ද යත් පයින් ඇවිදීම හේතුකොටගෙනම මගේ දෙපා ඉදිමී ඇති බැවිනි.

ඒ නමුත්, දැනුත් මා සම්බන්ධයෙන් ප්‍රතික්ෂේප කිරීම් වැඩිය. මා හොඳ බැව් හැමදෙනාම කියති. ඒත් මට අවස්ථාවක් නොලැබෙයි. මගේ තත්ත්වයේ සිටින බොහෝ යුවතියෝ යටත් වෙති. ඔවුහු අධ්‍යක්ෂවරුන් හෝ නිෂ්පාදකවරුන් හැටියට හඳුන්වනු ලබන කාමුක මිනිසුන් සමඟ නිදි යහනට යති. ඒ තත්ත්වයට නොවැටෙමැය මම යළි යළිත් මටම කියා ගනිමි.

ඉබ්සන්ගේ ඩෝල්ස් හවුස් - බෝනික්කි ගෙදර - නාට්‍යයේ පරිවර්තිත ව්‍යාඛ්‍යානයක් සඳහා හඬ පරීක්ෂණයක් පැවැත්වෙන බැව් තරුණියට දැනගන්ට ලැබෙයි. අධ්‍යක්ෂවරයා රුසියානු පුහුණුවක් ඇති නාට්‍ය රුසියකු වන ශාන් මින් මහතාය. මේ පුවත සවනට වැටුණු මොහොතේ සිටම ඇය පසු වන්නේ බලවත් කැලඹීමෙනි; උනන්දුවෙනි. ඉබ්සන්ගේ මෙම නාට්‍යය ඇය පාසලේදී කිහිප වතාවක්ම කියවා ඇත. ඒ වන විටත් නෝරාගේ පද පේළි ඇයට කටපාඩම්ය. මේ චරිතය ලබාගැනීම ගැන නම් එතරම් බලාපොරොත්තුවක් තබාගත නොහැකි බැව් දන්නා නමුත් වෑයමක් කරමැයි ඇය තමාටම කියාගන්නීය. කිසිම ප්‍රතිඵලයක් නොලැබුණත් තමාට ඔවුන් තුළ හැඟීමක්වත් ඇති කරන්ට හැකි වනු ඇත්තේය. ඒ සඳහා අධ්‍යක්ෂ ශාන් මින් හමු වන්ට අවස්ථාවක් සැලසෙනුද ඇත.

ඇය ශබ්ද පරීක්ෂණය උදෙසා ලියාපදිංචි වී සිය කොටස සඳහා සූදානම් වන්නීය. තමාට සවන් දෙන්නැයි ඇය සිය අසල්වාසී කාන්තාවන්ට ඇරයුම් කරයි. ඔවුන්ගේ සුප් බඳුන් උදුන් මතම තබාගෙන වුණත් තම රංගන කථනයට සවන් දෙන්නැයි ඇය මෙම කාන්තාවන්ගෙන් ඉල්ලා සිටියි. බෝංචි සහ කැරට් අල කපමින් සිටින මේ කාන්තාවන්ට ඉඳගන්නට ඇය පුංචි පුටුද ගෙනැවිත් තබන්නීය! හඬ පරීක්ෂණය පැවැත්වෙන දින වේලාසනින්ම අවදි වන ඇය සිය මුහුණට යාන්තම් වේෂ නිරූපණයක් දෙන්නීය. ඇයට ආත්ම විශ්වාසයක්ද සුවපහසුවක්ද දැනෙයි. හඬ පරීක්ෂණය පැවැත්වෙන කලා සමාජ ශාලාවට මුලින්ම පැමිණෙන්නී ඇයයි. දොරටුව බාර මිනිහා සමඟ කතාබහක යෙදෙන ඇයට දැනගන්ට ලැබෙන්නේ මේ වන විටත් දින තුනක පරීක්ෂණ සිදුව ඇති බවය.

හොඳම ආරංචිය නම් ශාන් මින් මහතා තවමත් කෙනෙකු සොයමින් සිටින බවය. ඇසි පිය සලන දොරටුවේ මිනිහා තරුණියට සුබපතන්නට සිය දෑත එක්කොට ගනියි.

නවය වන විට තරුණ කතුන්ගෙන් මුළු කාමරයම පිරිලාය. මේස පුටු පිළිවෙළට තබන්ට පටන්ගනිති. වේදිකාව පිළියෙල වුණාට පසුව ශාන් මින් දර්ශනය වෙයි. දැනටමත් ඔහුට ඇති වී - එපා වී - ඇති ගානය. වහාම හඬ පරීක්ෂණය ආරම්භ කරන්නැයි ඔහු නියෝග කරයි.

තමාගේ වාරය පැමිණෙන තුරු බලා සිටින අතරවාරයේදී ලෑන් පින් කරන්නේ අධ්‍යක්ෂවරයා දෙස පරීක්ෂාවෙන් බලා සිටීමය; ඔහුගේ සමීප දර්ශනයක් ලබාගැනීමය. හෙතෙම මෘදු හඬින් කතා කරන මිනිහෙකි. අඳින්නේ කපු පිළියෙන් කළ කංචුකයකි. හිස පලඳින්නේ ප්‍රංශ බෘරේ එකක් හෙවත් කුඩා හිස්වැස්මකි. සිගරැට්ටුවකින් දුම් උරන අතර ඔහුගේ අතෙහි රැඳුණු තේ පූකුරුවකි. ඔහුගේ සහායකයෝ අයදුම්කරුවන්ට ඔවුන්ගේ අංක කියා අඬගසති. ඔහු හැඟීමකින් තොරව ඔවුන් දෙස බලා සිටියි.

තරුණියෝ තමන්ගේ සබකෝලය මැඩගන්ට කළ හැකි හැම දෙයක්ම කරති. එකියක ගැඹුරට හුස්ම ගන්නා අතර සෙසු යුවතියෝ උගුරු සම්බාහනය කරති. ගැහෙන හදින් යුතුව ලෑන් පින්ද තම වාරය එන තුරු බලා හිඳින්නීය. කලින් සිතා සිටි තරමටම ඇය තුළ කැලඹීමක් ඇත්තේ නැත. තමා සිරමැදිරියේ ගත කළ කාලය ගැන ඇය මෙනෙහි කරයි. ඊටත් වඩා බයංකාර දෙයක් තිබිය හැක්කේද? ඇගේ මුවට සිනහවක් නැඟෙයි.

ශාන් මින් මහතා වෙනස හඳුනාගනියි. මහපටැඟිල්ල නිකට මත රුවාගෙන ඉදිරියටද නැමී ඔහු බලා සිටින්නේ තරුණිය දෙසය. ලෑන් පින්ගේ මුළු දර්ශන වාරය පුරාම ඔහු සිටින්නේ එම ඉරියව්වෙනි. ඉනික්බිතිව ඔහු කිසිවක් නොදොඩයි. තමා දෙස ඔහු බලා සිටින බැල්මෙන්ම මේ මිනිහා තමා ගැන පැහැදී ඇති බැව් ලෑන් පින් දන්නේය. ඇය කාමරයෙන් පිටව යන්නට පෙර නැඟී සිටින ශාන් මින් ඇයට අත වනයි. ඔයා ඒ කොටස කරන හැටි මට තව වතාවක් බලන්ඩ ඕනෑ.

ඇය එකී කොටස යළිත් කරයි

මාතෘකා