මාවෝ චීනයේ ආත්මය නම් මමද එසේ වෙමි

 ඡායාරූපය:

මාවෝ චීනයේ ආත්මය නම් මමද එසේ වෙමි

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

ඔහුගේ සිනිඳු සිරුර. රන් පැහැති සම. ඔහු ලජ්ජාව නොහඳුනන නිරුවත් දෙවියෙකි. ඔහු කෙරේ ඇති රසලෝලිත්වයෙන් මට නම් මිදීමක් - අවසානයක් - නැත්තේය. ඔහුගේ කිලිටි ඇඳුම් ළඟම මා ඔහු වෙනුවෙන් පිළියෙළ කර ඇති අහර බඳුන් සමීපයෙහි සිට මම ඔහුගේ සිරුරු පහසේ රස විඳගනිමි. මම මගේ හැට්ටයේ බොත්තම් ගලවමි. ඔහු සතුටු කරන්නට මා තුළ ඇත්තේ දැඩි පෙළඹුමකි. ඔහු මුව අරියි. හරියට බිළිඳකු වගේය. මිහිරට සිනාසෙයි. මගේ යට ඇඳුම ඉවත් කරමින්ම මම මෘදු ලෙස ඔහු පහසමි. ඔහුගේ දෑත මගේ සිරුර ස්පර්ශ කරනු මට දැනෙන්නේ ඒ මොහොතේදීය.

ඔහුගේ අනුරාගයේදී නදියක හැපෙන කුණාටුවක සංගීත රාවය මට ඇසෙන්ට වෙයි.

අවුරුදු ගණනාවකට පසුවද කාලය නමැති මහ කන්ද එතැනම සිටගෙනය. ඒ කුණාටුවේ සහ නදියේ අනුරාගය තාමත් ඒ කන්ද සිහියට නඟනු විය හැක. අපි අන්ධකාරයේ ඇවිදිමින් සිටිමු. අප තුන්දෙනා. යූ කුවෙයිගේ මිත්‍රයෙක් අපට වඩා එක නිවාස පේළියක් පසුපසින් අප හා ගමන් කරමින් සිටියි. මේ තමා අපේ උත්සවය ඔහු පවසන්නේ උද්දාම හැඟීමෙනි. මම සිනාසෙමි. කලබලයෙන් නමුදු තැති ගැන්මෙනි. මඟපෙන්වීම සම්බන්ධයෙන් මම ඔහුට ස්තුති කරමි. අපේ මිත්‍රයාට අපට ළඟා වනු පිණිස අපි අපේ ගමන බාල කරමු. ඉනික්බිතිව යූ කුවෙයි ඔහුගේ මිත්‍රයාට මා භාර දෙයි. හේ තෙමේ රහසිගත කොමියුනිස්ට් ඒජන්තවරයෙකි. ආරක්ෂාව ගැන නැවතත් මිත්‍රයාට කතා කරන ඔහු උපදෙස් දෙන්නේ යිශවු පාරේ සේද කර්මාන්තශාලාව පිටුපස ඇති පටු පාර දිගේ යන ලෙසය. ශින් මින් පාරේ හරස් වීදිය දිගේ නොයා යුතු බවටද ඔහු මිත්‍රයාට උපදෙස් දෙයි. ඔත්තුකාරයින්ගෙන් ප්‍රවේසම් වෙන්ඩ. මිනිහා හිස සලයි. ජය වේවා! යූ කුවේයි මට කොඳුරා කියයි.

මම මිනිහා පසුපස යමි. මගේ හදවත බෑගයක් තුළ දැමූ හාවෙකි. අපි ඉක්මන් අඩි තබමින් ඝනවට පඳුරු වැවී ඇති කුඩා උද්‍යානය දෙසට ගමන් කරමු. මිනිහා පටු පාරට වැටෙයි. අපි එදෙසට හැරෙන්ට පෙර මිනිහා පිටුපස බලයි.

අඩහෝරාවකින් පසුව මා කොමියුනිස්ට් පක්ෂයේ සාමාජිකයකු හැටියට ප්‍රකාශ කරනු ලැබෙයි. මා මගේ දිවුරුමත් ලියාපදිංචියත් සම්පූර්ණ කළා පමණි.

කතිරයට තබන ලද දෑකැත්තක් සහ මිටියක් සහිත සිගරට් පැකැට්ටුවක් තරම් කුඩා රතු කොඩියකට මුහුණ ලා මිට මොළවාගත් සිය දකුණු අත හිසට උඩින් ඔසවන විට යුන්හේ සිතන්නේ යූ කුවෙයි ගැනය. දැන් වනාහි, තමන් දෙදෙන ආත්මගත සගයින් වෙතැයිද තමා ඔහුගේ සහකරු වෙතැයිද ඇය සිතන්නීය. ඔහුගේ හැම කටයුත්තකටම ප්‍රවේශ වීමේ අයිතියක් දැන් ඇයට ඇත්තේය. ඇයට ඔහු සමඟම පිටත යා හැකිය. රහසිගත රැස්වීම්වලටද රහසිගත ස්ථානවලටද යා හැකිය. චීනය වෙනුවෙන් දැන් දෙදෙනාටම සිය ජීවිත පරදුවට තබා කටයුතු කළ හැකිය. කොමියුනිස්ට්වාදය පිළිබඳව ප්‍රමාණවත් දැනීමක් තවම ඇයට ඇත්තේ නැත. ඊට කමක් නැත. ඇය යූ කුවෙයි විශ්වාස කරන්නීය. ඒ හොඳටම ඇතිය. ඇය ආදරය කෙරෙහි විශ්වාසය තබන්නේ යම් සේද එපරිද්දෙන්ම කොමියුනිස්ට් පක්ෂය කෙරේද විශ්වාසය තබයි. ඇය තමන්ගේ අනන්‍යතාව දකින්නේ - තම මුහුණුවර හඳුනාගන්නේ - යූ කුවෙයි තුළය. යූ කුවෙයි චීනයේ හෘද සාක්ෂිය නියෝජනය කරන්නේ යම් සේද ඇයද එසේ කරන්නීය. 1931 වසරේදී ඇය තමා දකින්නේ ඒ ආකාරයෙනි. වීරවරියක - නායක ආර්යාවක - පිළිබඳ ඇය තුළ වන් ප්‍රතිරූපය හා එය මොනවට සැසඳෙයි. පසු කලෙකදී ඒ මෝස්තරයම යළි යළිත් මතු වෙයි. මාවෝගේ බිරිඳ බවට පත් වූ පසු තර්කානුකූලවම ඇය සිතන්නී මෙසේය: මාවෝ චීනයේ ආත්මය නම් මමද එසේ වෙමි.

එය සිදු වන්නේ අප එකට ජීවත් වන්ට පටන්ගෙන මාස කිහිපයක් ගත වන තැනේදීය. එක් සතියක් යූ කුවෙයි තැනින් තැනට ගමන් කරන අතර හදිසියේම අතුරුදහන් වෙයි. ඔහු සිටින්නේ කොහේදැයි දැනගන්ට කිසිවෙකුටත් නුපුළුවන. ඊළඟට මට දැනගන්ට ලැබෙන කාරණය නම් ඔහු අත්අඩංගුවට ගෙන ඇති බවය. සිරගත කොට ඇති බවය. මරා දමා ඇතැයිද කියවෙයි. යූ ෂාන් පැමිණ මට මේ පුවත දන්වන්නීය.

මම දොර හරින්ට බිය වෙමි. යූ ෂාන් දොරට තට්ටු කරන ආකාරයෙන්ම මා වටහාගන්නේ අතිශයින්ම බරපතළ භයානක දෙයක් සිදුව ඇති බවය. යූ ෂාන්ගේ කඳුළින් සේදුණු මුහුණ දෙස මම බලා සිටිමි. මගේ මනස සපුරාම හිස්ය. එයින් කිසිවක් අවබෝධ කොටගත නොහෙයි.

කිසිවක් කරන්නට මට අවශ්‍යය. එහෙත් යූ ෂාන් කියන්නේ බලා සිටීම හැර මට කරන්ට දෙයක් ඇත්තේ නැති බවය. එතකොට කොමියුනිස්ට් පක්ෂය? මම විමසමි. පක්ෂයට ඔහු බේරාගන්ට බැරිද? ඇය හිස සලයි. පක්ෂය වැටී ඇත්තේත් බරපතළ තත්වයකටය. පක්ෂයේ සාමාජිකයින් සැඟවී සිටින්ට තීරණය කර ඇත. සියලු සන්නිවේදන සබඳතා ඔවුන් විසින් කපා දමා ඇත්තේය. ආරක්ෂාව හේතුවෙනි. දැන් රාජ්‍ය නායකයා බවට පත්ව සිටින යුද නායක චියෑං කායි ෂෙක් විසින් කොමියුනිස්ට්වාදීන් එක්සත් කිරීමේ කටයුත්ත පාවා දී ඇත්තේය. කොමියුනිට්වාදීන් අත්අඩංගුවට ගනු සඳහා ඔහු විසින් මිලිටරි මෙහෙයවීමකට නියෝග දී ඇත. කොමියුනිස්ට්වරුන් තමන්ගේ ලොකුම සතුරන් යයි ඔහු විසින් ප්‍රකාශයක් කර ඇත්තේය. ඔහුගේ නියෝගයේ මෙසේ සඳහන් වෙයි. එක කොමියුනිස්ට්කාරයෙකු අල්ලා ගැනීම උදෙසා අහිංසකයින් දහසක් මරන්ට සිදු වුණත් එසේ කරනු.

මේ කඩාවැදීම් ආරම්භ කරන්නේ කවදාදැයි යූ කුවෙයි දැන සිටියේද? මම අසමි.

ඔව්, යූ ෂාන් පිළිතුරු දෙන්නීය. තමාද ඉන්නේ අවශ්‍ය අයගේ ලැයිස්තුවේ බව ඔහු දැනගත් ලකුණු තිබුණා. නිදසුනක් හැටියට කියනවා නම් විශ්වවිද්‍යාලයට බල කරල තිබුණා කොමියුනිස්ට් පක්ෂයේ සාමාජිකයින් කියල හඳුනාගෙන සිටි සියලුම ශිෂ්‍යයින් විශ්වවිද්‍යාලයෙන් පහ කරන්ඩ. නමුත් මගේ සහෝදරයට වැඩ කරගෙන යන්ඩ සිද්ද වුණා. අත්අඩංගුවට ගැනීම් පටන් ගනිද්දි එයා වෑයම් කෙළේ තමන්ගෙ පිරිස නගරයෙන් පිට කරල ගම් ප්‍රදේශවලට යවන්ඩ. පොදු ප්‍රවාහන සේවයට අයත් බස් එකක් ඇතුළෙ රහසිගත රැස්වීමක් තියෙන කොටයි එයාව අඳුනගෙන අත්අඩංගුවට අරගෙන තියෙන්නෙ.

සිය ජීවිතයේ මුල් වසරවලදී, යූන්හේ කර ඇත්තේ, අනතුර සමඟ අඟර දඟර කිරීමය. අනතුර යනු අගේ උද්යෝගය දැල්වූ ගිනිසිලය. පාළුවට ගිහින් තිබුණු පන්සලට ඇතුළු වී කොන්ෆියුසියස් ප්‍රතිමාවේ සළුව ගලවාගෙන පැමිණි මොහොතේදී ඇයට එය මහත් විනෝදයක් ගෙන දුනි. උඹලගෙ කසය බිම දමාපල්ලා යයි ගායනා කරමින් වීදියට බැස පොලිස්භටයින් ඉදිරියට ගිය අවස්ථාවත් ඇයට විනෝදයට කාරණයක් විය. එදා පිරිස ඉදිරියේදී පොලිස්භටයාගෙන් ප්‍රශ්න කළ අවස්ථාවේදී ඇයට දැනුණේ තම ජීවිතයට තේරුමක් ඇති බවය. තමුසෙ චීන ජාතිකයෙක්ද? ජපන්නු ඇවිත් තමුසෙගෙ අම්මත් නංගිත් දූෂණය කරද්දි, තමුසෙගෙ තාත්තත් සහෝදරයත් මරා දමද්දි තමුසෙ ඒක දරාගෙන ඉන්නෙ කොහොමද?

සිය චරිතය ප්‍රකාශයට පත් කිරීමට ඇයට අවස්ථාව සලසා ඇත්තේ අනතුරයි. ඔහේ හරිම දුර්වල මිනිහෙක්.... පසු කලෙක ඇය තමාගේ තුන්වැනි සැමියාට කියන්නීය. තමුසෙ යථාර්ථයට මුහුණ දෙන්නෙ නෑ. හැංගෙනවා. තමුසෙ ජීවත් වෙන්නෙ මායා ලෝකෙක. පාලනය වෙන්නෙ භීතියෙන්.

එහෙත් 1931දී යූ කුවෙයි අත්අඩංගුවට ගත් අවස්ථාවේදී වීරවරියක පිළිබඳ භූමිකාවෙන් ඇය බිඳී ගිය මොහොතක් උදා වුණි. හදිසියේම ඇය කිව නොහෙන පමණට භීතියට පත් වූවාය. යූ කුවෙයි ගැන තොරතුරු දැනගැනීම සඳහා ඇය දිනපතාම යූ ෂාන් හමුවන්ට යයි. ඇය බලා සිටින්නේ නොඉවසිල්ලෙනි. හැම දිනෙකම ඇගේ බලාපොරොත්තුවෙන් බිඳක් බොඳ වෙයි. අන්තිමේදී යූ කුවෙයි මරණයට පත්ව ඇතැයි ඇය වටහාගනියි. ඇය තමාට සිදු වූ විපත ගැන සිය මිතුරන්ට කියන්ට වෙයි. ඇගේ දෑසින් උණු කඳුළු කඩා හැළෙයි. ඇය සුදු ඇඳුමක් අඳියි. හිසෙහි සුදු ෙඩ්සි මලක් පළඳියි. ඇය දුක් වෙයි. ඉනික්බිතිව, යූ ෂාන් හමු වන්ට යාම නවත්වයි.

ඇය මුහුණ සෝදාගනියි. සුදු ඇඳුමත් ඬේසි මලත් ඉවත් කරයි. ඇය යළිත් පන්තිවලට යන්ට පටන්ගන්නීය. දහඅටවැනි සියවසේ ශෝකාන්ත නාටක පාඨමාලාවක් සඳහා ඇය මුදල් බඳියි. විදුහලේ අවන්හලෙහි අලුත් රැකියාවක් භාරගනියි. පන්තිවලින්ද රැකියා කටයුතුවලින්ද නිදහස් වූ පසුව, ඇයට මහත් පාළුවක් දැනෙන්ට වෙයි. ඇය තනිවම මුහුදු වෙරළට යන්නීය. අහසේ දීප්තිමත්ව බබළන සඳපහන යට මුහුදට ළංව ඇය නිහඬව සිටියි. මුලදී නම් පිරිමින් හිනා වන විට ඇය ඉවත බලාගනියි. නමුත් පසුව ඒ සිනාවලට ප්‍රතිචාර සිනා පායි. ඉනික්බිතිව ඇය යළිත් ක්‍රියාශීලීය.

පරිවර්තනය | ඩබ්ලියු. ඒ. අබේසිංහ

මාතෘකා