බලාපොරොත්තු පොරකන නිදි වර්ජිත රාත්‍රීන්

 ඡායාරූපය:

බලාපොරොත්තු පොරකන නිදි වර්ජිත රාත්‍රීන්

අන්චී මින් විසින් චීන සංස්කෘති විප්ලවයේ නිරුවත හෙළි කරමින් ඉංගිරිසි බසින් ලියන ලද Red Azalea නමැති නව ප්‍රබන්ධය ඇමෙරිකාවේත් සෙසු බොහෝ රටවලත් පිටපත් ලක්ෂ ගණනින් මේ වන විට අලෙවි වී ඇත. Becoming Madam Mao නමැති කෘතියේද ඓතිහාසික පසුබිම සංස්කෘති විප්ලවය වුවද එහිලා කතුවරියගේ අවධානය වඩාත් යොමුවී ඇත්තේ මාවෝ මැතිනියගේ පෞද්ගලික ජීවිතය කෙරෙහිය. 1919 - 1933 අතර කාලය තුළ යුන්හේ හැටියටද, 1934 - 1937 අතර කාලය තුළ ලෑන් පින් හැටියටද, 1938 - 1991 අතර කාලය තුළ ජියෑන් චින් හැටියටද ඇගේ චරිතය විවරණය කරන අන්චී මින්,

චීන ඉතිහාසයේ අභූතපූර්ව චරිතයක් වූ කාමෝන්මාදයෙන්ද උන්නතිකාමයෙන්ද පරිපීඩත මෙම අතිවිශේෂ රුදුරු ගැහැනියගේ චරිතය ගොඩනගන්නේ ඉතිහාසයද චරිතලේඛනයද මොනවට සම්මිශ්‍රණය වූ රසාල්පිත ප්‍රබන්ධකරණ රීතියකිනි.

පරිවර්තනය | ඩබ්ලියු. ඒ. අබේසිංහ

ෆෙයාලින්ටත් මටත් ගොවි පවුලක් සමඟ ජීවත් වන්ට නියම කර ඇත්තේය. බිම නිදාගැනීම හේතුකොටගෙන මගේ බෙල්ල උලුක්කු වෙලාය. දිනක් ගෙහිමියා උදේ සුබ පතන්ට පැමිණි වේලෙහි මගේ වේදනාව ගැන මම ඔහුට කිව්ෙවමි. ඊළඟ දිනයේ ගෙහිමියා අප දෙදෙනාට පිදුරු - පැදුරු දෙකක් ගෙනත් දෙයි.

රාත්‍රියේදී හොඳට නිදාගැනීමේ මගේ බලාපොරොත්තුව කඩාකප්පල් කරන්නේ ෆෙයාලින්ය. අපේ කාරිය තමයි, මැද පන්ති දුර්වලකම් ජයගැන්ම, ඇය පවසයි. එසේ කියන ඇය පිදුරු පැදුරු දෙක අකුලා ගෙහිමියා අතටම ආපසු දෙයි.

සතියක් පමණ බාගෙට නිදාගැනීම හේතුකොටගෙන මම ගිලන් වෙමි. ෆෙයාලින්ද මුළු රැයම උඩ විසි වෙවී නිදයි. එක උදයක පාතරාසයෙන් ඉක්බිතිව අසල්වැසි ගැහැනියකද කැටුව පැමිණෙයි. ඇය රෙදි මසන්නියකි. ඇගේ රෙදි මහන කාමරය අපට දෙන්නැයි ඉල්ලීමක් කර ඇති බැව් ගෙහිමියා පවසයි. එහි ඇඳක් ඇති බැව් රෙදි මහන්නිය කියයි. දුර්වල ඇටකටු ඇති නගරයේ සහෝදරවරු ගෙබිම මත නොව ඇඳන්වල නිදාගැනීමට කැමැත්තෝය.

මේ අවස්ථාවේදී වචනයකුදු කතා නොකර ෆෙයාලින් ඒ යෝජනාව පිළිගනියි. අපි බඩු අස්කරගෙන මහන්නිය පිටුපස ඇගේ කාමරයට යමු. අපට ඇඳන් දෙකක් ලැබෙයි. එකක් උණ ලීයෙන් තැනුණු තනි ඇඳකි. අනෙක සීලිමෙන් එල්ලා වැටෙන තවත් ඇඳකි. ඇත්තටම එය පුවරුවකි රෙදිපිළිද එක එක වර්ගයේ රෙදිකඩමාළුද එහි දමා ඇත. එය පළලින් අඩි හතරක් පමණය. දිගින් අඩි අටකි. එය ගෙබිමේ සිට අඩි හතක් පමණ උසය. සීලිමේ ගෑවෙන නොගෑවෙන තරම්ය.

ෆෙයාලින් යෝජනා කරන්නේ මා පුවරුව මතත් ඇය ඇඳ උඩත් නිදාගත යුතු බවය. මං ඔයා වාගෙ නෙමෙයි. ඔයා නම් කුරුල්ලෙක් වාගෙ, ඇය පවසයි. පුවරුවට මගේ බර දරන්ඩ බෑ. මං වැටුණොත් එහෙම ඔයාගෙ ඇට කටු ටිකත් පොඩි වෙලා යාවි.

ලෑල්ලක් සහිත ඇඳ දෙස බැලූ සැණෙකින්ම මට හිසරදයක් හැදෙයි. එයට ළඟා වෙන්ට නම් මා පළමුව ඇගේ ඇඳට අඩිය තැබිය යුතුය. ඊට පස්සේ කකුල් උස්සා මගේ ඇඳ කියන පුවරුවට ගොඩ විය යුතුය. මා එහි වැතිරගත් පසුව නැඟිට ඒ මත හිඳගන්ටවත් බැරිය. මන්ද යත්, මගේ හිස සීලිමේ ගෑවෙන නිසාය.

රාත්‍රි කාලයේදී ඇය බිත්තියට හේත්තු වී නිදාගන්නීය. අනිත් පැත්තට හැරෙන්ටවත් ඇයට බය සිතෙයි. ඇය ඇඳෙන් බිමට වැටෙනු වළක්වනු සඳහා, ගරාදි වැටක් ඇත්තේද නැත. නොයෙක් වර ඇයට සිහිනෙන් පෙනෙන්නේ තමා පුවරුවේ නෙත්තියටම පෙරළී බිමට වැටෙන්ට ඔන්න මෙන්න කියා සිටින බවකි. ඇයට මේ භීතියට පුරුදුවීම සඳහා සති කිහිපයක්ම ගත වෙයි. රාත්‍රි කාලයේ දී ඇඳෙන් බිමට බැහීම වළක්වන අදහසින් ඇය හවස තුනෙන් පසුව වතුර බිඳක්වත් බොන්නේ නැත.

වියළි ධාන්‍ය එකතු කළායින් පසුව කුඹුරේ ඉපනැල්ල ප්‍රවාහණය කරනු සඳහා ඔවුන්ගේ කණ්ඩායම යොදවනු ලැබෙයි. ඒ සඳහා යොදාගන්නේ තනි රෝදයේ කරත්තයකි. මේ කරත්තය පාවිච්චි කරන හැටි ඉගෙනගන්ට ලෑන් පින්ට මඳ කාලයක් ගත වෙයි. එය මෙහෙයවන ක්‍රමය ඉගෙනගත් පසුව ඇය කරත්තයේ හැඬල දෙක සිය දෑතින්ම අල්ලාගෙන සිරුර පාලනය කරගැනීම සඳහා ඉදිරියට නැමෙයි. ඉනික්බිතිව කරත්තය තල්ලු කරගෙන යන්ට වෙයි. කන්දේ පහළට යන විට ඇය හැඬල දෙක තමා දෙසට ඇද නැවතී, මඳක් ඇණතියාගනියි. කරත්තයේ තිරිංගය වනුයේ ඇයගේ ශරීරයේ බරය. ඇතැම් අවස්ථාවල ඇය මුළු ගමන පුරාම එසේ ඇණතියාගෙන කරත්තය ඉදිරියට ගෙන යන්නීය. එවිට ඇගේ තට්ටම් දෙක බිම ඇතිල්ලීගෙන යයි. ඈට මෙන් ෆෙයාලින්ට කරත්තය ගෙන යා නොහැක. වංගු ගනිද්දී ඇය පෙරළී බිම වැටෙයි.

ලෑන් පින් තුළ, දුර ගැන හැඟීමක් ඇති වන්ට පටන්ගනියි. තමාත් තමා කරන්ට අදහස් කරන භූමිකාවත් අතර විශාල දුරක් ඇත්තේය. ඇයට එය ග්‍රහණය කරනු උගහටය. සැලකිය යුතු මිනිසුන් තමාට මුණ ගැහෙන්නේ කවදාදැයි ඇය සිතන්ට වෙයි.

ඔයා හමුදා භටයෙක් නම් ඒකට ගැළපෙන්න වැඩ කරන්ඩ. ෆෙයාලින්ගේ ස්වරය දැඩිය. හරියට සිවිල් වැසියෙක් වාගෙ, ප්‍රශ්න අහන්ඩ එපා. උදාහරණයක් හැටියට මා ඕ දකින්ඩ යන්ඩ වාගෙ ප්‍රශ්න අහන්ඩ එපා. හදිසියේම ෆෙයාලින් අධෝවාත පිට කරන්ට වන්නීය. ලොකු ශබ්දයකි. එය නිකුත් වන්නේ ඇය කතා කරන වැකිය මැදීදය. ගන්දස්සාරය ඉවසන්ට බැරිය

හුඟක් අල කන නිසා, සෙසමේ කියන්ට වෙයි.

ගෑස් පෙති දෙන්ඩද? ලෑන් පින් ඉදිරිපත් වෙයි.

ෆෙයාලින් කෙළින්ම බලාගෙන සිටින්නේ අනෙකියකගෙන් අධෝවාතය පිට වූ බවක් අඟවන්නටය. ඒ එක්කම ඇය දිගටම අධෝවාත පිට කරන්ට වෙයි. කෙල්ලෝ සිනාසෙන්ට වෙති. එක අධෝවාතයක් කොතරම් දිග ද යත් මිනිත්තුවක් පමණ කල් රඳා සිටියි. එය අවසන් වෙද්දී අඩු වේගෙන යන හඬට සවන්දෙන කෙල්ලන්ගේ සිනාව නවත්වාගන්ට බැරිය.

නාන කාමරයට යන්ට අවශ්‍ය වූ විට මා කළ යුත්තේ පොහොර වළක ඇණතියාගැනීමය. මේ වළේ විෂ්කම්භය අඩි තුනක් පමණි. මේ වළ හරහා ඇත්තේ එකම දැව ලෑල්ලකි. වැසි දිනවල එහි මතුපිට බෙහෙවින් ලිස්සනසුලුය. ඒ ගැන සිතන විටත් මට සියල්ල එපා වෙයි. මම තුවක්කු පාවිච්චි කරන හැටි ඉගෙනගනිමි. ග්‍රෙනේඞ් වීසි කරන හැටිත් පඳුරු අතරිනුත් ගල් උඩිනුත් පෙරළි පෙරළී යන හැටිත් ඉගෙනගනිමි. මම සටන් කරමි. වැඩ කරමි. මට නම් කොමියුනිස්ට්වාදය කියන්නේ පොකුණට වැටුණු හඳකි. කැඩපත මත පෙනෙන කුසුමකි. අන් සියලු දෙයකින්ම පැවසෙන්නේ මා සිටින්නේ වැරදි ස්ථානයේ බවය.

රාත්‍රියේ දෙගොඩහරියයි. මට අතීසාරය හැදී ඇත. මේ සීතලේ බිමට බැස ෆෙයාලින් ඇහැරවන්ටත් බැරිය. පැයක් පමණ උඩ විසි වෙවී පෙරළි පෙරළී සිටියද තවදුරටත් මට දරාගෙන ඉන්ටම බැරිය. මම ඇඳුම් ඇඳගෙන පහළට බසිමි. ෆෙයාලින් තද නින්දේය. මා එළියට යන විට අන්ධකාරය ඇවිත් මා ඔතාගනියි. ලෑල්ල මත සමබරව ඇණ තියාගන්නේ කෙසේදැයි මම සිතන්ට වෙමි. ෆෙයාලින්ට කූද්දන්ටත් මට සිතෙයි. නමුත් මම අදහස වෙනස් කරගනිමි. මොහොතකින් ආපසු හැරී ගොස් දොර ඇරගන්ඩ සමත් වෙමි.

මාතෘකා