මා සිත්ගත් කෘතිය ‘බුදු දහමේ හරය’ නම් පරිවර්තනයයි

 ඡායාරූපය:

මා සිත්ගත් කෘතිය ‘බුදු දහමේ හරය’ නම් පරිවර්තනයයි

සිනමාවේදී ජයන්ත චන්ද්‍රසිරි

පස්දෙනෙකුගෙන් යුත් පවුලක වැඩිමලා ලෙස උපන් මගේ ගම බණ්ඩාරවෙල. මට නංගිලා දෙන්නෙක් හා මල්ලිලා දෙන්නෙක් ඉන්නවා. මගේ අම්මා ගෘහණියක්. තාත්තා කොළඹ වරායේ අලියා බෝට්ටු රියදුරෙක්. ඒ වගේම ඔහු දෙවන ලෝක යුද්ධ සමයේ මිලිටරි සාජන්ට් කෙනෙක් විධියටත් සේවය කරලා තියෙනවා. ගෙදර ඉන්න වෙලාවට තාත්තා ඉංග්‍රීසි බසින් ලියවුණු පොත් කියවනවා. ඔහු පොත් කියවන විධිය පුංචි මගේ මතකයේ රැඳිලා තිබුණා. පොත්පත් කියන්නේ කියවා දැනුම වඩා ගත යුතු මාධ්‍යයක් බව මම මුලින්ම දැනගත්තේ තාත්තාගෙන්. තාත්තා කවදාවත් පොත් කියවන්න කියලා මට බලපෑමක් කළේ නැහැ.

මගේ පාසල රාගම හීන්කෙන්ද මහා විද්‍යාලය. ඒ පාසලේ එක් පොත් රාක්කයකට පමණක් සීමා වුණු බොහොම කුඩා පුස්තකාලයක් තිබුණා. ඒ විධියේ අල්ප පහසුකමක් අපට තිබුණේ. කොහොම හරි ටික ටික වයසින් මුහුකුරා යද්දි මම පොතපත කියවන්න හුරු වෙනවා.

අපේ පංතිවල සිටි යාළුවන් අතරේ පොත්පත් හුවමාරු කරගන්න පුරුද්දක් මේ වන විට ඇති වෙලා තිබුණා. පාසල් වෙලාවෙන් පසු පොත්වලටම මිතුරන් හමු වෙන පුරුද්දක් අපට තිබුණා. මේ කාලයේ ඩීමන් ආනන්දගේ පොත් හරිම ජනප්‍රියයි. ඔහුගේ පොත් අතර තිබු මාරක කතා, ප්‍රේම කතා ආදී සියල්ල මම කියෙව්වා. ඩීමන් ආනන්දගේ පොත් මගේ කියවීමේ රුචිය වැඩි කළා කියල කියන්න පුළුවන්. කාලයත් සමඟ ඔහුගේ පොත්වලින් කරුණාසේන ජයලත්ගේ පොත්වලට මම සංක්‍රමණය වනවා. ඒවගේම මාර්ටින් වික්‍රමසිංහ, එදිරිවීර සරච්චන්ද්‍ර වැන්නවුන්ගේ නිර්මාණ රස විඳීමටත් මම පුරුදු වුණා. මේ නිසා තරුණ වියට එන විට මම හොඳ පොත් කියවන්නෙක් වෙලා සිටියා.

මේ විධියට කියවූ පොත් අතරින් මගේ මතකයේ වැඩියෙන්ම රැඳිලා තියෙන්නේ මෑතකදී කියවූ පොතක්. එය සාඕ පුආචු (Zhao Puachu) නම් චීන ජාතික ලේඛකයා විසින් රචනා කර ඇති Essentials of Buddhism: Questions and Answers කෘතියයි. මෙය පර්සි ජයමාන්න හා වාන් ෂියායෝ තුං නැමැති අය විසින් ‘බුදු දහමේ හරය’ ලෙසින් සිංහලට පරිවර්තනය කර තිබෙනවා. මා මෙය මිලට ගත්තේ මෙවර බී.එම්.අයි.සී.එච්. පොත් ප්‍රදර්ශනයෙන්. එය සුරස ප්‍රකාශනයක්.

ඕනෑම ආගමික දර්ශනයක ඉතිහාසයේ සිට අද දක්වා පවතින නොවිසඳුණු ගැටලු එහි පෙන්වා දී තියෙනවා. ඉන් බුදු දහමේ අපට පවතින එවැනි ගැටලු මනාව විසඳා ‍දෙනවා. මේවා බොහෝ විට ආගමික නොවන දාර්ශනික ගැටලු විය හැකියි. බොහෝ විට ධර්ම කථික භික්ෂුන්, ආසියාතික පඬිවරු, බටහිර පඬිවරු ලබාදුන් සාර්ථක දාර්ශනික පිළිතුරුයි එහි අැතුළත් වෙන්නෙ. මේ පිළිතුරුවලින් කියවන්නා තුළ තෘප්තිමත් සහ විශ්වාසනීය බවක් ඇති කරනවා. මෙය ඇත්තටම ශාස්ත්‍රීය ග්‍රන්ථයක්. ප්‍රශ්නයක් අසමින් එයට ලබාදෙන පිළිතුරක් ආකාරයෙන් එය ලියවී ඇත්තේ. එ් නිසා කෘතිය වඩා රසවත් වෙනවා. කෘතියේ මුල් කොටසින් බුදුන්ගේ පුද්ගලික දිවියත්, දෙවන කොටසින් දර්ශනයේ හරය, ව්‍යාප්තිය හා ආගමික සාහිත්‍යයත්, තෙවන කොටසින් සංඝ සමාජය පිළිබඳවත් දක්වා තිබෙනවා. එනිසා ඉන් සංඝයා වහන්සේලා ගැන භක්තිය වැඩි වෙනවා. චීන ජාතික කතුවරයා විසින් මුළු ජීවිත කාලයක් පුරා කරන ලද අධ්‍යයනයක සාර්ථක ප්‍රතිඵලයක් වශයෙනුත් මේ කෘතිය අපට හඳුන්වන්න පුළුවන්.

 

සටහන [එරංගා පල්ලියගුරුගේ]

මාතෘකා