විෂ මත්ද්‍රව්‍යවලට ඇබ්බැහි වී සිටින දරුවන් පුනරුත්ථාපනයට ජනපති උපදෙස්

 ඡායාරූපය:

විෂ මත්ද්‍රව්‍යවලට ඇබ්බැහි වී සිටින දරුවන් පුනරුත්ථාපනයට ජනපති උපදෙස්

දිවයින පුරා අවුරුදු 18ට අඩු දරුවන් එක් ලක්ෂ පහළොස් දහසකට ආසන්න පිරිසක් විෂ මත්ද්‍රව්‍යවලට ඇබ්බැහි වී සිටින බව මේ වන විට අනාවරණය කරගෙන තිබෙන අතර ඔවුන් පුනරුත්ථාපනය වෙනුවෙන් පළාත් මට්ටමින් විශේෂ වැඩසටහනක් ක්‍රියාවට නංවන ලෙස ජනාධිපති මෛත්‍රීපාල සිරිසේන මහතා මත්ද්‍රව්‍යවලට ඇබ්බැහිවූවන් පුනරුත්ථාපනය කිරීමේ ජාතික අධිකාරිය වෙත උපදෙස් දී තිබේ.

මත්ද්‍රව්‍ය පිළිබඳ ජනාධිපති කාර්ය සාධන බලකාය, අන්තරායකර ජාතික ඖෂධ පාලක මණ්ඩලය සහ පොලීසිය ඒකාබද්ධව සිදු කළ මෙම සමීක්ෂණ වාර්තාව පසුගියදා ජනාධිපතිවරයා වෙත බාර දුන් අතර එම වාර්තාව මඟින් වැඩිදුරටත් පෙන්වා දී ඇත්තේ වයස අවුරුදු 18ට අඩු දරුවන් 6,100ක් හෙරොයින් විෂ මත්ද්‍රව්‍ය භාවිතය සඳහා ඇබ්බැහි වී ඇති බවත් දිවයින පුරා පුද්ගලයන් ලක්ෂයකට ආසන්න පිරිසක් දිනකට හොරොයින් මත්ද්‍රව්‍ය සොයා යන බවත්ය. එම පිරිස අතරින් 1,500ක් පමණ කාන්තාවන් වන අතර පිරිමි පුද්ගලයන් සංඛ්‍යාව 85,000කට ආසන්න වේ. තවද ලක්ෂ තුනකට ආසන්න පිරිසක් ගංජා භාවිතා කරන බවට මෙම සමීක්ෂණයේදී අනාවරණ වී ඇත. ඒ අතර කාන්තාවන් 1,500ක් සිටී.

ජනාධිපතිවරයාගේ මගපෙන්වීමෙන් දිවයින පුරා ක්‍රියාත්මක මත්ද්‍රව්‍ය නිවාරණ ජාතික වැඩසටහන යටතේ සිදු කළ විශේෂ මෙහෙයුම්වලදී ඉකුත් මාස 06 තුළ විෂ මත්ද්‍රව්‍ය සම්බන්ධයෙන් සැකකරුවෝ 40,846ක් අත්අඩංගුවට ගනිමින් නීතිවිරෝධි මත්ද්‍රව්‍ය කිලෝ ග්‍රෑම් 3500කට අධික ප්‍රමාණයක් අත්අඩංගුවට ගෙන ඇත. ඒ අතර හෙරොයින් කිලෝ ග්‍රෑම් 1029 ග්‍රෑම් 997 මිලි ග්‍රෑම් 170ක ප්‍රමාණයක් සමඟ සැකකරුවන් 20309ක් අත්අඩංගුවට ගෙන ඇත. ගංජා කිලෝ ග්‍රෑම් 2378 ග්‍රෑම් 950 මිලි ග්‍රෑම් 381ක් සමඟ අත්අඩංගුවට ගෙන ඇති පිරිස 20015කි.

මෙම අත්අඩංගුවට ගැනීම් තවදුරටත් පුළුල් කරමින් දෛනිකව පවතින ඉල්ලුම අවම කර ඊට ඇබ්බැහි වූවන් පුනරුත්ථාපනය වෙනුවෙන්ද විශේෂ වැඩසටහන් ක්‍රියාත්මකය. ඒ වෙනුවෙන් විශේෂ අන්තර් පාලන ඒකකයක්ද ජනාධිපතිවරයාගේ උපදෙස් පරිදි පිහිටුවීමට කටයුතු කර ඇත. ඒ අතරතුර රට තුළට මත්ද්‍රව්‍ය ගෙන එන සියලු මාර්ග පිළිබඳවද විශේෂ මෙහෙයුම් දියත් කර තිබේ. මේ අතර මත්ද්‍රව්‍ය මර්දනය සඳහා මේ වන විට ගෙන යන පුළුල් වැඩපිළිවෙළ කාර්යක්ෂම කළ හැකි අන්දමින් සහ ඊට ගැළපෙන අයුරින් සුරාබදු නීතිද සංශෝධනය කර ලබන සතිය වන විට කැබිනට් මණ්ඩලයට ඉදිරිපත් කරන ලෙස ජනාධිපතිවරයා අදාළ අංශවලට උපදෙස් දී තිබේ.

සුරාබදු රෙගුලාසි කඩකරන සුරාබදු බලපත් හිමියන්ට එරෙහි නීති දැඩි කිරීමටද ජනාධිපතිවරයා සුරාබදු දෙපාර්තමේන්තුව වෙත උපදෙස් නිකුත් කර ඇත. පළාත් වශයෙන් විෂ මත්ද්‍රව්‍ය සඳහා වැඩිම පිරිසක් ඇබ්බැහි වී ඇත්තේ බස්නාහිර පළාතෙන් බව සොයා ගෙන තිබෙන අතර දකුණ, වයඹ, මධ්‍යම සහ උතුරු පළාතෙන්ද විශාල ප්‍රමාණයක් වාර්තා වෙයි. එම පළාත් ආශ්‍රිතව විශේෂ පුනරුත්ථාපන වැඩසටහන් ක්‍රියාත්මක කිරීමටත් මීට අමතරව සමස්ත දිවයිනම ආවරණය වන පරිදි මත්ද්‍රව්‍ය භාවිතයේ අහිතකර බලපෑම් පිළිබඳ දැනුවත් කිරීම් පාසල්, දහම් පාසල්, වැඩබිම් සහ ස්වේච්ඡා සංවිධාන ආශ්‍රිතව ක්‍රියාත්මක කිරීමටත් ජනාධිපතිවරයාගේ උපදෙස් පරිදි කටයුතු කරමින් පවතී.