ජාතික මත්ද්‍රව්‍ය නිවාරණ සතියේ අවසන් මහා සමුළුව අද ජනපති ප්‍රධානත්වයෙන්

 ඡායාරූපය:

ජාතික මත්ද්‍රව්‍ය නිවාරණ සතියේ අවසන් මහා සමුළුව අද ජනපති ප්‍රධානත්වයෙන්

 

ජාතික මත්ද්‍රව්‍ය නිවාරණ සතියේ අවසන් දින මහා සමුළුව අද (01) ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් කොළඹ සුගතදාස ක්‍රීඩාංගණයේදී පැවැත්වේ.

 

මතින් නිදහස් රටක් ගොඩනැගීම සඳහා ජනාධිපතිවරයාගේ මඟපෙන්වීම යටතේ පසුගිය 23 වැනිදා සිට ක්‍රියාත්මක වූ ජාතික මත්ද්‍රව්‍ය නිවාරණ සතිය ඊයේ අවසන් විය. එහි ප්‍රධාන සමුළුව අද පෙරවරුවේ පැවැත්වේ. ජූනි 26 වැනිදාට යෙදුණ මත්ද්‍රව්‍ය භාවිතය හා නීතිවිරෝධි ප්‍රවාහනයට එරෙහි ජාත්‍යන්තර දිනයට සමගාමීව ජනාධිපතිවරයාගේ මඟපෙන්වීම යටතේ පාසල් දරුවන්, විශ්ව විද්‍යාල සහ වෘත්තීය අධ්‍යාපනය ලබන සිසුන් මෙන්ම පොදු ජනතාව ඉලක්ක කර ගනිමින් දීප ව්‍යාප්තව ජාතික මත්ද්‍රව්‍ය නිවාරණ සතිය ක්‍රියාවට නැංවිණි.

 

මේ අතර මත්ද්‍රව්‍ය නිවාරණ ජනාධිපති කාර්ය සාධක බලකාය, අන්තරායකර ඖෂධ පාලක ජාතික මණ්ඩලය හා ශ්‍රී ලංකා පොලිසිය එක්ව මත්ද්‍රව්‍ය භාවිතයේ ව්‍යාප්තිය පිළිබඳ ජාතික සමීක්ෂණ වාර්තාවක්ද පිළියෙල කර තිබේ.  ජනාධිපති මාධ්‍ය අංශය පැවසුවේ එම වාර්තාව අද පැවැත්වෙන සමුළුවේදී ජනාධිපතිවරයා වෙත පිළිගැන්වීමට නියමිත බවයි.  මත්ද්‍රව්‍ය නිවාරණ ක්‍රියාවලිය පිළිබඳ ජනතා විශ්වාසය තහවුරු කිරීම උදෙසා නඩු කටයුතු අවසන් කළ නීතිවිරෝධි මත්ද්‍රව්‍ය කිලෝග්‍රෑම් 1695ක් ප්‍රසිද්ධියේ විනාශ කර ඇති අතර 2015 වසරේ සිට 2019 වසර දක්වා අත්අඩංගුවට ගෙන ඇති විවිධ වර්ගවලට අයත් විෂ මත්ද්‍රව්‍ය ප්‍රමාණය කිලෝග්‍රෑම් 24818යි ග්‍රෑම් 395යි මිලිග්‍රෑම් 767කි.