ක්‍රීඩා ඇමැතිගෙන් නව පූර්වාදර්ශයක් : කිලිනොච්චි ක්‍රීඩා සංකීර්ණය තර්ජනී සිවලිංගම් අතින් ක්‍රීඩක අයිතියට

 ඡායාරූපය:

ක්‍රීඩා ඇමැතිගෙන් නව පූර්වාදර්ශයක් : කිලිනොච්චි ක්‍රීඩා සංකීර්ණය තර්ජනී සිවලිංගම් අතින් ක්‍රීඩක අයිතියට

දේශපාලනඥයන් විසින් ක්‍රීඩා සංකීර්ණ ක්‍රීඩක අයිතියට පත්කිරීමේ සම්ප්‍රදායට තිත තබමින් කිලිනොච්චි ක්‍රීඩා සංකීර්ණය ජාතික දැල්පන්දු ක්‍රීඩිකා තර්ජනී සිවලිංගම්ගේ සුරතින් ජනතා අයිතියට පත්කිරීමට ක්‍රීඩා අමාත්‍යාංශය සැලසුම්කර තිබේ. මෙම මස 17 වැනිදා ක්‍රීඩාංගණය ක්‍රීඩක අයිතියට පත්කිරීම වෙනුවෙන් පවත්වන උත්සවයේදී එය ඇය උතුරු පළාත් ක්‍රීඩක, ක්‍රීඩිකාවන්ට නිල වශයෙන් බාරදෙනු ඇතැයි ක්‍රීඩා අමාත්‍යාංශ යේ ඉහළ පෙෙළ් ප්‍රකාශකයකු පැවසීය.

‘අපිට අවශ්‍ය තමන්ගේ දක්ෂතාවයෙන් ක්‍ර්‍රීඩකයන් නෙළාගන්නා ක්‍රීඩා පහසුකම් ඔවුන්ගේ සුරතින්ම අනාගත ක්‍රීඩකයන්ට ලබාදෙන්නයි. උතුරේ බිහිවූ දක්ෂ ක්‍රීඩකයන් අතරින් විශාල පිරිසකට එළියට එන්නට හැකිවුණේ නැහැ. දශක තුනක සාපලත් සිවිල් යුද්ධයකින් එම ප්‍රදේශයේ ජනතාව පීඩා වින්දා.

එය අප රටක් වශයෙන් ලැබූ සුවිශාල පරාජයක්. අපි උත්සාහ ගන්නේ උතුර, දකුණ, නැගෙනහිර හෝ බටහිර එසේත් නැතහොත් රට මැද කියා වෙනසකින් තොරව මව්බිම සතු තාරුණ්‍යයේ ජවය ජාත්‍යන්තරයට රැගෙන යන්නයි. ඒයන ගමනේදී දශක තුනක් පමාවුණු උතුරේ තාරුණ්‍යයේ හැකියාවන් එළිදැක්වූ ක්‍රීඩකයන් කීපදෙනා අතර තර්ජනී සිවලිංගම් ප්‍රමුඛයි. ඇය දැල්පන්දු ක්‍රීඩාව මගින් ආසියාව දිනාදෙන්න විශාල මෙහෙවරක නිරත වුණා. අවස්ථා ගණනාවකදී රට වෙනුවෙන් බොහෝ යුතුකම් කළා.

ඉතින් කිළිනොච්චිය ක්‍රීඩා සංකීර්ණය අලුත්වැඩියා කරන්න, උතුරේ තාරුණ්‍යයට නව බලාපොරොත්තු ඇතිකරන්න ක්‍රීඩා අමාත්‍යංශ ප්‍රමුඛ රජය දිරිගන්වලා වක්‍රාකාරයෙන් මූලිකත්වය ගත්තේ ඇයයි. ඊට කෘතගුණ පෑමක් වශයෙන් කිළිනොච්චි ක්‍රීඩා සංකීර්ණය විවෘත කිරීමේ ගෞරවනීය අවස්ථාව ඇයට පිරිනැමෙනවා.

මෙය ක්‍රීඩා අමාත්‍ය හරින් ප්‍රනාන්දු මහතා ගත් උදාර තීරණයක්. එතුමාගේ අතින් මෙය ක්‍රීඩක අයිතියට බාරදෙනවා වෙනුවට ජනාධිපති මෛත්‍රීපාල සිරිසේන මහතාගේ සහ අග්‍රාමාත්‍ය රනිල් වික්‍රමසිංහ මහතාගේ උපදෙස්වලට අනුව අමාත්‍යවරයා එම අවස්ථාව තර්ජනී සිවලිංගම් ක්‍රීඩිකාව වෙත පවරා තිබෙනවා. එය සමස්ත උතුරේ ක්‍රීඩක, ක්‍රීඩිකාවන් මගින් ඇය අභිනන්දනයට පත්කිරීමේ අවස්ථාවකට සමානයි’ යැයි ක්‍රීඩා අමාත්‍යාංශය ප්‍රකාශ කළේය.

රුපියල් මිලියන 350ක වියදමින් අදාළ ක්‍රීඩා සංකීර්ණය නවීකරණය කර ඇති අතර එහි මීටර් 400ක ධාවන පථයක් ද ඉදිකර තිබේ. මෙම ධාවන පථය සින්තටික් ධාවන පථයක් බවට පත්කිරීම නුදුරේදීම ආරම්භ කරන බව ක්‍රීඩා අමාත්‍ය හරින් ප්‍රනාන්දු මහතා පැවසීය. ඒ මහතා සඳහන් කළේ දිවයිනේ ප්‍රදේශ ගණනාවක මේ ආකාරයෙන් සුපිරි ක්‍රීඩා සංකීර්ණ ඉදිකිරීමට අපේක්ෂා කරන බවයි. මේ අතර ක්‍රීඩක අයිතියට පත්වන කිලිනොච්චි ක්‍රීඩා සංකීර්ණයේ පිහිනුම් තටාකයක්, ගෘහස්ථ ක්‍රීඩාංගණයක්, ක්‍රීඩාගාරයක් යන පහසුකම්වලින් සමන්විත වෙයි.

[කසුන් ඉරුගල්බණ්ඩාර]

මාතෘකා